LAÇ- Kremtimet për festën e Shna Ndout në Laç kulmojnë sonte më 12 qershor, ku besimtarë të shumtë janë mbledhur në ambientet e kishës dhe përrreth saj. Në përfundim të 13 të martave të peligrinazhit, besimtarët mblidhen te kisha e Shna Ndout dhe qëndrojnë gjithë natën së bashku me familjarët e tyre.
Me urimin “Na ndihmoftë” ata u ngjitën më këmbë malin e shenjtë drejt kishës dhe qëndrojnë për orë të tëra duke u lutur dhe qëndruar me të afërmit e tyre. Me qirinj në duar pelegrinët të ardhur nga i gjithë vendi e më gjerë luten për ditë më të paqta, harmoni e shpëtim.
Kremtimet mbyllen nesër, më 13 Qershor që njihet ndryshe si “dita e madhe”, datë kur Shën Antoni i Padovës kaloi në amshim. Kryeipeshkvin e Kishës Katolike Arjan Dodaj është shprehur se kjo ditë është një ngushëllim për të gjithë besimtarët që kalojnë natën në Kishën e Shna Ndout.
“Unë jam shumë i lumtur që është natë e madhe për mua dhe dëshiroj që të jetë një natë e madhe për çdo shqiptar që do të ndjekë. Kur isha i vogël, 35 vite më parë. Takimi i parë, eventi i madh fetar në Shqipëri ka ndodhur në këtë datë, më 12 qershor, në natën e Shën Ndojit më 12 qershor 1990. Edhe me ardh këtu pas 25 vitesh është një ngushëllim i jashtëzakonshëm,” tha Dodaj
