TIRANË- OSBE/ODIHR prezantuan këtë të hënë gjetjet e raportit paraprak për zgjedhjet parlamentare të 11 majit. Të pyetur për sistemin e patronazhimit të PS dhe përplasjen e Sekretarit të Përgjithshëm të PD, Flamur Noka një ditë më parë në Vorë me mbështetës të PS, anëtarë të fisit Xhabafti, Lamberto Zannier tha se ishte në dijeni të asaj që kishte ndodhur. Ndër të tjera ai shtoi se misioni i OSBE/ODIHR është të vëzhgojë procesin elektoral dhe jo të kryejë hetime, detyrë e cila shtoi ai është e autoriteteve ligjzbatuese shqiptare.
“Kur kam vizituar Qendrat e Votimit kam pyetur se kush ishin personat. Kemi parë edhe raste kur personat largoheshin. Ne monitorojmë procesin, kur ka persona që rrinë më larg e kemi të vështirë, se ne nuk kemi mandat që të hetojmë. Ne jemi të vetëdijshëm se çfarë ndodhi në Vorë dje dhe njoftuam vëzhguesit tanë që ta monitoronin situatën dhe ishin të pranishëm. Nuk kemi mandatin apo funksionin e policisë, duhet të garantohen nga vetë Shqipëria. Nëse ka patur probleme me mosreagimin e policisë, duhet të ketë një reagim,”tha Zannier.
