Bashkimi Evropian është optimist për formimin e shpejtë të Kuvendit dhe Qeverisë së re të Kosovës, pas zgjedhjeve të parakohshme të 28 dhjetorit, ku Lëvizja Vetëvendosje e Albin Kurtit arriti fitore. Kështu kanë deklaruar përfaqësuesja e lartë e BE-së, Kaja Kallas, dhe komisionarja për Zgjerim, Marta Kos.
Në deklaratën e tyre, ata theksuan nevojën për që Qeveria e re të dyfishojë përpjekjet për reformat që lidhen me integrimin në BE. BE-ja vlerësoi pjesëmarrjen e partive nga të gjitha komunitetet në këto zgjedhje, duke e parë këtë si një tregues të angazhimit për parimet demokratike.
Zyrtaret evropiane i bënë thirrje Kuvendit që, sapo të formohet, të ratifikojë marrëveshjet që lidhen me Planin e Rritjes, një program që synon të sjellë mbi 800 milionë euro për Kosovën në kuadër të një investimi total prej 6 miliardë eurosh për Ballkanin Perëndimor. Kurti, pas fitores, shprehu dëshirën për bashkëpunim me partitë opozitare për këto marrëveshje.
Kallas dhe Kos theksuan se ratifikimi i marrëveshjeve është në interes të Kosovës dhe duhet bërë sa më shpejt që të përfitojë popullata. Ndërkohë, ata përmendën edhe rëndësinë e dialogut mes Kosovës dhe Serbisë, një proces i ndërmjetësuar nga BE-ja, i cili është thelbësor për përparimin drejt integrimit evropian.
“Presim që të gjitha obligimet nga Marrëveshja për normalizimin e marrëdhënieve, si dhe marrëveshjet e mëparshme, të zbatohen pa vonesa,” u shprehën zyrtaret evropiane. Kosova dhe Serbia kanë rënë dakord për një marrëveshje në vitin 2023, e cila, edhe pse nuk është nënshkruar, konsiderohet e obligueshme për të dyja palët nga Brukseli.
Marrëveshja përfshin aspekte të vetëmenaxhimit për komunitetin serb në Kosovë, njohjen e simboleve shtetërore dhe angazhimin e Serbisë për të mos penguar anëtarësimin e Kosovës në organizata ndërkombëtare. Po ashtu, kërkohet që Prishtina dhe Beogradi të zbatojnë të gjitha marrëveshjet e mëparshme të arritura gjatë dialogut.
