Mesfushori maroken Hakim Ziyech është bashkuar zyrtarisht me skuadrën Wydad Casablanca në një transferim të lirë, pas pesë muajsh pa kontratë. I njohur si “magjistari”, Ziyech përfaqëson Kombëtaren e Marokut, ndonëse ka lindur në Holandë dhe ka luajtur më parë në ekipet U-20 dhe U-21 të këtij vendi.
Ziyech u transferua te Chelsea në sezonin 2020/21 nga Ajax për 40 milionë euro. Gjatë dy sezoneve të para me “Blutë”, ai arriti të fitojë Ligën e Kampionëve, UEFA Superkupën dhe Kampionatin Botëror për Klube. Megjithatë, forma e tij filloi të bie dhe në sezonin e fundit, u transferua te Galatasaray në Turqi. Pas vetëm 23 ndeshjesh, kontrata e tij u ndërpre me marrëveshje të dyanshme në janar të 2025.
Pas Galatasaray, Ziyech kaloi te Al-Duhail në Katar, ku luajti në 9 ndeshje dhe shënoi një gol, por u lirua nga ky klub pas katër muajsh. Me 32 vjet, Ziyech ishte në kërkim të një klubi të ri dhe bëhej fjalë për bisedime me Bologna, Fiorentina dhe Sevilla. Sidoqoftë, sipas gazetarit të njohur Fabrizio Romano, ai vendosi të rikthehet në atdhe dhe firmosi me Wydad Casablanca.
Aktualisht, Wydad ndodhet në vendin e dytë në kampionatin Botola Pro, një pikë pas kryesuesve të Maghreb de Fez dhe me një ndeshje më pak. Kjo lëvizje e Ziyech tregon vendosmërinë e tij për të rikthyer karrierën dhe për të kontribuar në sukseset e skuadrës në kampionatin vendas.
