Pas më shumë se një dekade ndërprerje, naftësjellësi Selanik–Shkup do të rikthehet në funksion deri në fund të këtij viti. Kryeministri maqedonas, Hristijan Mickoski, ka njoftuar se procedurat për rinisjen e këtij transporti po përfundojnë, duke filluar provat e presionit. Naftësjellësi, ndërtuar si pjesë e marrëveshjes së vitit 1999 me “Hellenic Petroleum”, është transformuar nga një sistem për transportin e naftës së papërpunuar në një produktsjellës që do të transportojë vetëm derivate të përpunuara të naftës për rafinerinë OKTA në Shkup.
Gjatësia e tubacioneve është rreth 213 kilometra, me kapacitet për të transportuar 2.5 milionë tonë karburant në vit. Sipas marrëveshjes mes qeverisë maqedonase dhe kompanisë greke, transporti do të kushtojë 20 euro për ton. Nëse naftësjellësi punon me kapacitet të plotë, vlera e shërbimit do të arrijë rreth 50 milionë euro në vit, që do të ndahet mes Qeverisë së Maqedonisë dhe “Hellenic Petroleum”.
Me përfundimin e procedurave, karburanti do të mund të qarkullojë sapo Ministria e Transportit të lëshojë lejen e nevojshme. Kjo do të aktivizojë një licencë të lëshuar vitin e kaluar, për një periudhë prej 35 vitesh. Kryetari i Komisionit Rregullativ për Energjetikë ka bërë të ditur se licenca do të hyjë në fuqi sapo operatori “Vardaks” të marrë lejen nga shteti.
Megjithatë, ka polemika politike lidhur me këtë rikthim. VMRO–Partia Popullore ka shprehur dyshime për qëllimet e këtij projekti, duke aluduar se ai është i orientuar për të ndihmuar Serbinë në krizat e saj me naftë. Kryeministri Mickoski ka theksuar se roli i Qeverisë është të sigurojë infrastrukturën, por jo të hyjë në operacione biznesi.
Nga ana tjetër, ekspertë të energjisë, si profesori Dejan Trajkovski, kanë vënë në dukje se rishtazi i rikthyer naftësjellësi është një mundësi për transport më të sigurt dhe të lirë të derivateve të naftës, sidomos në krahasim me transportin me kamionë. Konstrukcioni i tij përfundoi në vitin 2002, por ndalimi i përpunimit në rafinerinë OKTA në vitin 2013 e shndërroi këtë projekt në një problem të ri për vendin.
Historia e marrëveshjes me “Hellenic Petroleum” ka qenë e komplikuar, duke përfshirë disa procese arbitrazhi që kanë rezultuar në dëmshpërblime për Maqedoninë. Sipas funksionarëve, riaktualizimi i naftësjellësit do të ndihmojë në përmbushjen e obligimeve të kësaj marrëveshjeje.
