TIRANA– Xhevdet Troplini, i njohur si Poja është kreu i një organizate të fuqishme kriminale që trafikon lëndë të forta narkotike nga Amerika Latine në drejtim të Europës. I penduari i drejtësisë, Nuredin Dumani në dëshmitë e tij përballë autoriteteve në Tiranë ka zbardhur rolin e Visit të Pojës dhe lidhjen e tij me Adi Çobën dhe klanet e drogës. Dumani u shpreh se e njihte prej shumë vitesh Elvis Doçin, të cilin e njihte vetëm me emrin ‘Visi i Pojës’, për shkak të marrëdhënies së ngushtë kriminale që kishte pasur më parë me Fatmir Troplinin i njohur si “Miri”, bir i Xhevdet Troplinit dhe kushëri i Elvis Docit. Dumani dëshmoi se ai ishte negociator shumë i aftë për trafikun e heroinës dhe pas disa vitesh për kokainën me tonelata.
“E identifikoj shumë mirë, e njoh me emrin VISI. E njoh prej vitesh, që kur isha i vogël. Visi është një negociator shumë i aftë për trafikun e heroinës. Më pas, në vitin 2013, e la heroinën dhe filloi me kokainën. Për heroinë nuk e kam dëgjuar më, por për kokainë po. Me tonelata. Të gjithë e quajnë Visi i Pojës. Poja është Xhevdet TROPLINI. Visi i Pojës është djali i motrës së Xhevdet TROPLINI-t të quajtur Poja. Nuk ka ndonjë tjetër Visi,”thuhet në dosje.
