TIRANË– Seanca në Gjykatën e Posaçme për dosjen “Partizani” është shtyrë për në 23 prill në orën 13:00. Avokati Genc Gjokutaj foli jashtë ambienteve të GJKKO-së ku tha se kanë kërkuar pushimin e çështjes për mungesën e faktit penal.
Sipas tij në dosje gjen akte të pakomunikuara, ekspertë të palicensuar dhe firma të falsifikuara. Gjokutaj tha se kryeministri Edi Rama si “si autor i ndryshimit të truallit” duhet të thirret për të dëshmuar. Ai shtoi se seanca e sotme u shty për shkak të mungesës së një avokati.
“Ne e ritheksuam mungesën e faktit penal për të cilën ne kemi kërkuar pushimin e çështjes. Në dosje gjen akte të pakomunikuara, ekspertë të palicensuar, firma të falsifikuara, të cilat prokurori i dëgjon dhe hesht. Sali Berisha akuzohet, dhe Edi Rama nuk thirret, si autori i ndryshimit të truallit të klubit Partizanit. Ka hap siparin e kësaj procedure. E kemi kërkuar të thirret. Por në seancë paraprake nuk mund të thirrim dëshmitarë. Prokurorët nuk japin ndonjë herë përgjigje. Seanca sot u shty për shkak të mungesës së një avokati për shkak shëndetësor. Kishte raport mjekësor. U shty për datë 23 ora 13:00.“, tha Gjokutaj.
Dosja lidhet me privatizimin e ish-kompleksit sportiv të klubit Partizani, në ngarkim të kreut të PD-së Sali Berisha, dhëndrit të tij Jamarbër Malltezi dhe të tjerë emra nga biznesi. Malltezi që prej muajit nëntor të vitit 2023 është lënë në “arrest shtëpie” pasi akuzohet për korrupsioni pasiv, kryer në bashkëpunim lidhur me dosjen “Partizani”. Ai u la në këtë masë sigurie me vendim të gjyqtares Ilirjana Olldashi, e cila ndryshoi vendimin e shkallës së parë, duke e liruar nga burgu. Të implikuar në dosje sipas organit të akuzës janë edhe kreu i PD-së, Sali Berisha dhe biznesmeni Fatmir Bektashi.
Për akuzat e SPAK, Malltezi ka deklaruar se Prokuroria e Posaçme e ka nisur çështjen bazuar në një kallzim që, sipas tij, rezultoi i rremë nga Taulant Balla. Ai thotë se Prokuroria e Posaçme hetoi për 30 vjet Berishen deri tek mbesat që nuk i kishin lindur ende dhe në përfundim të katër viteve hetime dolën në përfundim se Berisha nuk ka shkelur asnjë ligj, dhe kurrë nuk i ka paguar askush asgjë. Më tej thotë se SPAK fillimisht pretendoi se toka ishte shtetërore por ka rezultuar gënjeshtër. Sipas tij, më pas pretendoi se Berisha kishte ndryshuar destinacionin e tokës por gjithashtu thotë se doli gënjeshtër pasi destinacionin e kishte ndërruar Edi Rama si kryetar i bashkisë edhe në 2004 (17,000 m2), edhe në 2006 (7,000 m2).
