Ish-presidenti amerikan Joe Biden shpalli se “Partia Demokratike është rikthyer” pas fitoreve të fundit në zgjedhje, në një fjalim të mbajtur në “Ben Nelson Gala” në Omaha të Nebraskës. Biden, 82 vjeç, tha se demokratët po kthehen më të fortë se kurrë, duke e kritikuar presidentin aktual Donald Trump për politikat e tij që, sipas tij, “dëmtojnë shtresat e varfra dhe përçajnë vendin.”
“Partia Demokratike është rikthyer. Nuk është hiperbolë, është fakt. Shikoni rezultatet e zgjedhjeve,” theksoi Biden, duke përmendur fitoret në shtete si New Jersey, Virginia dhe Nju Jork. Ai e ndau gjithashtu një moment të veçantë për shëndetin e tij, pasi kishte një fashë në kokë pas trajtimit për kancerin në prostatë, dhe përkujtoi djalin e tij të ndjerë, Beau Biden.
Biden e shprehu dhimbjen e tij duke thënë: “E di çfarë do të thotë kanceri, e di çfarë përjetojnë familjet. Djali im, Beau, heroi im, duhej të ishte president, jo unë.” Ai e kujtoi shërbimin e të birit në Irak dhe vdekjen e tij nga glioblastoma.
Në vijim, Biden akuzoi Trump-in se “po shkatërron Kushtetutën” dhe “po shkel demokracinë amerikane.” Ai u shpreh se “Trump punon për miliarderët, jo për popullin amerikan,” duke theksuar se në demokraci nuk ka mbretër, por Trump sillet si njëri prej tyre. Biden e kritikoi gjithashtu planin e Trump për ndërtimin e një salle të re balloje në Shtëpinë e Bardhë, duke e quajtur atë “simbolin perfekt të presidencës së tij.”
Ai tha: “Trump ka marrë një çekiç jo vetëm mbi Shtëpinë e Popullit, por mbi Kushtetutën, ligjin dhe vetë demokracinë.” Në përfundim, Biden apeloi për një bashkëpunim më të madh ndërmjet republikanëve, duke theksuar se bllokimi i qeverisë duhet të ndalet dhe se është imperativ që të mbështeten amerikanët e zakonshëm. “Kjo nuk është politikë, është moral. Askush nuk duhet të shkojë në shtrat i uritur në Amerikë,” përfundoi ai.
