Parlamenti grek ka miratuar njohjen e pakicës fetare bektashiane-alevite si një besim të pavarur, duke e cilësuar këtë komunitet që jeton kryesisht në Trakën Perëndimore si një entitet fetar të veçantë. Ligji, i cili kaloi me shumicë votash, do të hyjë në fuqi më 1 gusht 2025. Ai i jep këtij komuniteti jo vetëm njohjen zyrtare, por edhe njohjen juridike, duke përfshirë 13 nene që rregullojnë autonominë dhe funksionimin e tij të pavarur nga komuniteti mysliman grek.
Ligji trajton çështjet e pronave, të drejtat dhe detyrimet e anëtarëve, si dhe menaxhimin e teqeve dhe vakëfeve. Anëtarët e komunitetit tani do të kenë të drejta të barabarta, duke mundësuar ndërtimin e teqeve në Greqi, dhe njohjen zyrtare të atyre që deri tani kanë funksionuar në kushte ilegale.
Ky vendim është mirëpritur me festime nga bektashinj, sidomos në Trakë, duke shënuar një hap të rëndësishëm drejt promovimit të lirisë së besimit fetar në vend. Sipas informacioneve, numri i bektashinjve grek është rreth 4-5000, por zyrtarët besojnë se është më i lartë. Me këtë ligj, pritet që numri i anëtarëve të rritet, duke përfshirë emigrantë shqiptarë dhe bektashinj nga vende të tjera.
Ministria greke e Arsimit e cilëson këtë vendim si historik, duke e renditur Greqinë më lart në lirinë e kultivimit të besimeve dhe diversitetit fetar. Kryegjyshata botërore e Bektashinjve ndodhet në Shqipëri.
