Instituti i Gjeoshkencave ka njoftuar për reshje intensive që priten sot dhe nesër në veri dhe jug të Shqipërisë. Qarqet e Shkodrës, Kukësit, Dibrës, Lezhës, Durrësit, Elbasanit, Vlorës dhe Gjirokastrës mund të përballen me vërshime të shpejta të lumenjve të vegjël malorë, si dhe me rrëshkitje dherash. Problemet me përmbytjet lokale në zona urbane gjithashtu janë të mundshme, varësisht nga gjendja e kanalizimeve.
Në njoftimin e bërë përmes Facebook-ut, institucioni thekson se sipas llogaritjeve hidrologjike, reshjet e forta të ditëve të fundit do të shkaktojnë rritje të rrezikshme të prurjeve dhe niveleve në lumenjtë Drin-Buna, Liqenin e Shkodrës, lumin Mat, Shkumbin dhe Vjosë. Kjo situatë rrit rrezikun e përmbytjeve në lumin Drin-Buna dhe Liqenin e Shkodrës për gjatë ditësh së sotme dhe nesër.
Për sot pasdite dhe nesër, parashikohen reshje intensive deri në shumë intensive në qarqet Vlorë dhe Gjirokastër, ndërsa në Shkodër dhe Lezhë priten reshje intensive. Qarqet e tjera do të përjetojnë reshje mesatare deri në lokale intensive, me shtrëngata të shoqëruara. Në veripërëndim, lartësitë mbi 1000 m do të kenë reshje në formë dëbore.
Sa i përket temperaturave, nesër priten minimume dhe maksimume si më poshtë: në bregdet 9/16 °C, në vendet e ulëta 9/16 °C dhe në vendet malore 3/12 °C. Era do të fryjë me intensitet mesatar deri të fortë në bregdet gjatë ditëve në vijim.
Instituti i Gjeoshkencave nëpërmjet këtyre njoftimeve rekomandon kujdes të shtuar për qytetarët dhe autoritetet lokale për t’u përballur me rreziqet e mundshme që sjellin këto kushte atmosferike.
