Tarifat amerikane po e zhysin botën në një “luftë të hapur tregtare”, tha të enjten presidenti i një shoqate tregtare gjermane.
Paralajmërimi i tij erdhi disa orë pas njoftimit të presidentit të SHBA-së, Donald Trump për tarifa doganore 10% për të gjitha importet, shkruajnë mediat e huaja.
Dirk Jandura, president i Federatës Gjermane të Shitjes me Shumicë, Tregtisë së Jashtme dhe Shërbimeve (BGA), e quajti vendimin një “sulm frontal ndaj tregtisë globale”.
“Me rritje drastike të tarifave për më shumë se 100 partnerë tregtarë, presidenti amerikan po e zhyt botën në një luftë të hapur tregtare me një Brexit amerikan”, tha Jandura.
“Unë supozoj se konflikti do të ketë një ndikim të rëndësishëm në rritjen tonë ekonomike”, ka shtuar ai.
Si një vend eksportues, Gjermania do të goditet veçanërisht rëndë nga tarifa prej 20% e shpallur nga Trump për mallrat nga Bashkimi Evropian, e cila do të hyjë në fuqi më 9 prill.
Sektori vendimtar i automobilave në vend tashmë po përballet me ndërprerje masive, pasi një tarifë e madhe amerikane prej 25% për të gjitha makinat e importuara hyri në fuqi brenda natës.
