Këtë pasdite dhe nesër, priten reshje intensive në veri dhe jug të Shqipërisë. Instituti i Gjeoshkencave paralajmëron se qarqet Shkodër, Kukës, Lezhë, Vlorë dhe Gjirokastër mund të përballen me vërshime të shpejta të lumenjve të vegjël malorë dhe rrëshqitje dherash. Në zonat urbane të këtyre qarqeve, ka rrezik për përmbytje lokale për shkak të gjendjes së kanalizimeve.
Llogaritjet hidrologjike të IGJEO-s tregojnë se reshjet e fundit, që do të vazhdojnë deri më 8 janar, do të shkaktojnë rritje të rrezikshme të prurjeve dhe niveleve në lumenjtë Drin-Buna, liqenin e Shkodrës, si dhe në lumenjtë Mat, Shkumbin dhe Vjosë. Veçanërisht, lumi Drin-Buna dhe liqeni i Shkodrës priten të kenë rrezik të shtuar për përmbytje, me nivele të larta gjatë ditës së sotme dhe nesër.
Në lidhje me kushtet atmosferike, nesër parashikohen temperatura minimale dhe maksimale që do të arrijnë: në bregdet 13/17 °C, në vendet e ulëta 12/17 °C, dhe në vende malore 5/11 °C.
Instituti i Gjeoshkencave vijon t’u bëjë thirrje autoriteteve dhe qytetarëve për t’u bërë të kujdesshëm dhe të monitorojnë situatën, duke u angazhuar për masat e nevojshme për të minimizuar rrezikun nga përmbytjet dhe rrëshqitjet e dheut.
