GREQI- Pandeli Nakoleci, autori 40-vjeçar i vrasjes së gruas së tij 36-vjeçare Marjola Nakoleci do të sillet sot në Gjykatën e Volosit, në prani të tre fëmijëve të tyre të mitur, për të kërkuar falje para prokurorit. Ndaj 40-vjeçarit janë ngritur akuza për vrasje të qëllimshme ndaj një anëtari të familjes së tij, në kontekstin e dhunës në familje.
Sipas ekspertizës mjeko-ligjore të kryer në Selanik, goditja fatale ndaj 36-vjeçares iu shkaktua në gjoks nga një mjet prerës, një mjet gatimi që i ngjante një thike të madhe, ndërsa gruaja kishte lëndime të tjera, si shenja në duar, një tregues se ajo u përpoq të mbrohej gjatë ndjekjes nga burri i saj. Në të njëjtën kohë që i akuzuari do të paraqitet në gjykatë, në Shqipëri do të mbahet funerali i Marjolës.
Ndërkohë ende nuk dihet se çfarë do të ndodhë me kujdestarinë e fëmijëve të mitur. Krahas procedurave gjyqësore, çështja e kujdestarisë së tyre mbetet serioze. Tre prej tyre janë të mitur, të moshës 6, 13 dhe 16 vjeç, ndërsa një vajzë 18-vjeçare sapo ka mbushur moshën madhore.
Gazeta greke “Kathimerini” shkruan se me urdhër të Prokurorisë së Volosit, dje filloi një hetim urgjent social nga shërbimi social i Bashkisë. Punonjësit socialë dhe psikologët kanë filluar kontaktet me të afërmit nga të dyja palët, me qëllim që të shqyrtojnë se cili do të ishte mjedisi më i mirë për fëmijët.
Sipas informacioneve, dy motrat e 36-vjeçares, njëra në Skiathos dhe tjetra në Itali, kanë shprehur interes, ashtu si edhe gjyshi i saj nga ana e babait, i cili jeton në Shqipëri.
Qëllimi i fëmijëve është të qëndrojnë në Greqi dhe skenari më i mundshëm që po merret në konsideratë është caktimi i kujdestarisë tezes nga Skiathos, me mbështetje financiare nga tezja në Itali. Të gjitha procedurat do të përfundojnë pasi fëmijët të kthehen nga Shqipëria, ndërsa vendimi përfundimtar do të merret nga Prokuroria.
Avokati i të akuzuarit për krimin, i cili mori dosjen e çështjes dje, pritet të kërkojë një ekzaminim psikiatrik për të shqyrtuar gjendjen mendore të 40-vjeçarit në kohën e krimit. Mbrojtja duket se është e orientuar drejt thirrjes në faktorë psikologjikë që mund të kenë ndikuar në sjelljen e tij.
