Pallati i Kongreseve është përfshirë në planin e “Korporatës së Investimeve Shqiptare” për t’i kaluar një kompanie private. Sipas informacionit të shpërndarë në faqen zyrtare të Korporatës, edhe pse Pallati i Kongreseve është një monument kulture, ai do të dalë në ankand për t’u përmirësuar, duke u justifikuar me nevojën për “përmirësimin e cilësisë së infrastrukturës”.
Sipas “AICorporation”, godina do të shërbejë si një qendër për aktivitete kulturore, akademike dhe shoqërore.
“Në këtë mënyrë, një strukturë moderne dhe funksionale ka mundësinë të tërheqë sponsorë dhe investitorë të rinj, duke ndikur pozitivisht në klimën ekonomike të Tiranës dhe duke rritur attraktivitetin e qytetit për projekte të rëndësishme në të ardhmen,” thuhet në njoftimin e Korporatës.
Megjithatë, nuk sqarohet nëse objekti do të shembet dhe do të ndërtohet një i ri, apo do të bëhet thjesht një rikonstruksion i ndërtesës ekzistuese.
Pallati i Kongreseve është një monument kulture i kategorisë “Arkitekturë”, i shpallur si monument kulture me vendim nr. 122, datë 05.03.2007. Ai u ndërtua fillimisht për të organizuar kongrese të Partisë së Punës dhe festivale të ndryshme.
Ndër timi i tij filloi në vitin 1982 dhe përfundoi katër vjet më vonë, në vitin 1986, me ndihmën e ndërmarrjeve më të njohura të kohës. Gjatë ndërtimit, koncepti i modernizmit shtrihej jo vetëm në pamjen e jashtme, por edhe brenda ambienteve, ku çdo element i projektuar ishte menduar për t’u përshtatur me aktivitetet që do të zhvilloheshin aty, një funksion që Pallati i Kongreseve vazhdon ta ruajë edhe pas 20 vjetësh.
Pallati shtrihet për rreth 70 metra në drejtim paralel me shëtitoren dhe ka një lartësi që varion nga 18 deri në 23 metra. Qëllimi i ndërtimit ka qenë harmonizimi i tij me objektet përreth, si Muzeu Arkeologjik, stadiumi “Qemal Stafa”, Kryeministria dhe Radio-Televizioni Shqiptar.
Njoftimi i plotë:
Qëllimi kryesor i projektit është përmirësimi i cilësisë së infrastrukturës përmes rikonstruksionit dhe modernizimit të Pallatit të Kongreseve, duke e shndërruar atë në një strukturë multifunksionale që përmbush standardet bashkëkohore për konferenca, evente kulturore dhe tubime publike. Projekti synon modernizimin e vendit ekzistues të kongreseve, duke rritur cilësinë dhe funksionalitetin e infrastrukturës për konferenca, evente kulturore dhe mbledhje publike, në dobi të organizatorëve, institucioneve dhe pjesëmarrësve. Përmes rijetëzimit të Pallatit të Kongreseve, projekti pritet të tërheqë më shumë evente kombëtare dhe ndërkombëtare, duke nxitur turizmin, zhvillimin ekonomik lokal dhe krijimin e vendeve të reja të punës. Struktura e modernizuar do të shërbejë si një qendër për aktivitete kulturore, akademike dhe shoqërore, duke përmirësuar cilësinë e jetës së qytetarëve dhe duke forcuar angazhimin komunitar. Një strukturë moderne dhe funksionale ka gjasa të tërheqë sponsorë dhe investitorë të rinj, duke ndikuar pozitivisht në klimën ekonomike të Tiranës dhe duke rritur atraktivitetin e saj për projekte të rëndësishme në të ardhmen. Projekti do të mbështesë zhvillimin e aktiviteteve intelektuale dhe kulturore në Shqipëri, duke nxitur ndarjen e dijes, shprehjen artistike dhe bashkëpunimin ndërkombëtar – elementë thelbësorë për zhvillimin e vendit.
Institucionet Publike: Drejtoria e Shërbimeve Qeveritare, Instituti Kombëtar i Trashëgimisë Kulturore
Komuniteti: Institucionet shtetërore dhe organizatorët e eventeve, Sektori kulturor dhe artistik, Bashkia dhe Qyteti i Tiranës, Qytetarët dhe vizitorët, Bizneset lokale dhe sektori i turizmit
Partneri Privat: Përfiton pjesën përkatëse të zhvillimit sipas marrëveshjes
