Mijëra qytetarë amerikanë protestojnë në qytetet e mëdha, duke u bashkuar në aktivitete të quajtura “Pa Mbretër”, për të kundërshtuar politikën autoritare të Presidentit Donald Trump. Në Nju Jork, mbi 20 mijë njerëz marshuan në Times Square me pankarta si “Demokraci, jo Monarki” dhe “Kushtetuta nuk është opsionale”. Sipas Policisë, rreth 100 mijë protestues u mblodhën në pesë lagjet e qytetit, pa incidente.
Pas rikthimit në Shtëpinë e Bardhë, Trump ka ndërmarrë veprime të diskutueshme, duke përfshirë shtrirjen e pushtetit presidencial dhe përdorimin e Gardës Kombëtare, gjë që ka shkaktuar shqetësim në të gjithë vendin. Aktivistë, si Beth Zasloff dhe Massimo Mascoli, kanë ngritur alarmin për rrezikun e një qeverie autoritare dhe rëndësinë e ruajtjes së demokracisë. Në një intervistë për Fox News, Trump e mohoi akuzën për sjellje diktatoriale, duke thënë: “Nuk jam mbret”.
Kritikët e tij akuzojnë për shkelje të Kushtetutës dhe përpjekje për të shtypur zërat opozitarë. Ai gjithashtu është shprehur se do të kërkojë ndjekje penale për kundërshtarët, çka rrit shqetësimet për lirinë e shprehjes.
Politikanë të njohur demokratë, si Bernie Sanders, Chuck Schumer, Cory Booker dhe Adam Schiff, janë solidarizuar me protestuesit, duke kërkuar llogaridhënie dhe respekt për demokracinë. Sanders, gjatë një fjalimi në Uashington, tha: “Nuk e urrejmë Amerikën – e duam Amerikën”.
Solidariteti për protestat ka arritur edhe jashtë Shteteve të Bashkuara, me qytetarë në Berlin, Madrid, Romë, Londër dhe Toronto që shprehur mbështetje për protestuesit amerikanë. Në disa shtete, guvernatorët republikanë kanë urdhëruar mobilizimin e Gardës Kombëtare, një veprim që është kritikuar nga demokratët si një shenjë e sjelljes autoritare.
Një sondazh i fundit i Reuters/Ipsos tregon se vetëm 40% e amerikanëve miratojnë mënyrën si po e qeveris Trump, ndërsa 58% e shprehin pakënaqësinë. Ky rezultat është më i ulët se në fillim të mandatit të tij, duke reflektuar një rritje të tensioneve politike në vend.
