Policia e Tiranës ka marrë masat e nevojshme për garantimin e rendit publik në tubimin që do të zhvillohet sot në orën 18:00, para Kryeministrisë. Në kuadër të këtyre masave, janë parashikuar kufizime të lëvizjes në disa akse rrugore.
Sipas njoftimit, nga ora 09:30 deri në përfundim të tubimit, do të bllokohet qarkullimi i automjeteve në bulevardin “Dëshmorët e Kombit”, nga Ura deri në kryqëzimin me rrugën “Ismail Qemali”. Ndërkohë, nga ora 15:00 deri në përfundim të ngjarjes, do të mbyllen rrugët “Ukraina e Lirë”, “Papa Gjon Pali II” dhe “Ismail Qemali”.
Policia e Tiranës paralajmëron se, në varësi të zhvillimeve të tubimit, mund të ketë kufizime të mëtejshme në akse të tjera rrugore. Për të lehtësuar lëvizjen e qytetarëve që do të qarkullojnë në këto zona, autoritetet kanë planifikuar devijimin e qarkullimit në rrugë alternative.
Autoriteti policor apelon për mirëkuptimin e qytetarëve në lidhje me këto kufizime dhe këshillon që ata të distancohen në rast se bëhen dëshmitarë të veprimeve të kundërligjshme që mund të rrezikojnë rendin dhe sigurinë publike.
