Rreth orës 18:00 është parashikuar të nisë protesta e opozitës para godinës së Kryeministrisë. Edhe këtë herë, policia e Tiranës ka njoftuar se protesta nuk është autorizuar dhe ka marrë masa për sigurimin e rendit.
Gazetarja Dorjana Bezat raportoi se mbi 1300 forca policie janë në gatishmëri në zonën përreth, ndërsa Partia Demokratike (PD) përgatitet për fillimin e protestës. Fokusi i policisë do të jetë ruajtja e institucioneve shtetërore. Për këtë qëllim, janë vendosur masa antitubim, duke përfshirë autobote uji, zjarrfikëse dhe ambulanca, në rast se do të nevojiten.
Qarkullimi i automjeteve në urën pranë drejtorisë së policisë është ndaluar si një masë preventive. Nëse skenari i protestës do të jetë i ngjashëm me atë të javës së kaluar, pritet që tubimi të shoqërohet me trazira dhe hedhje molotovësh, si dhe lëndësh piroteknike.
