Ekrem Imamoglu, ish-kryebashkiaku i Stambollit aktualisht i arrestuar dhe një nga figurat kryesore të opozitës, ka siguruar nominimin presidencial nga Partia Popullore Republikane (CHP) për zgjedhjet e vitit 2028. Njoftimi u bë të dielën nga liderët e partisë, ndërsa mediat turke raportuan se mbështetja për Imamoglu ka qenë masive.
Ministria e brendshme e Turqisë njoftoi një ditë më parë se Ekrem Imamoglu është shkarkuar nga detyra si kryebashkiak i Stambollit. Kjo lëvizje vjen pasi ai u la në burg nga gjykata me akuzat për korrupsion.
Kryetari i CHP-së, Ozgur Ozel, bëri të ditur se rreth 15 milionë votues morën pjesë në zgjedhjet paraprake të partisë, duke i dhënë një mbështetje të gjerë kandidaturës së Imamoglu-t.
“Numri i votave që z. Ekrem Imamoglu ka marrë nga anëtarët tanë dhe kutia e votimit të solidaritetit është mbi 14.8 milionë,” tha Ozel në një tubim në Stamboll.
Votimi ndodhi vetëm disa orë pasi Imamoglu u arrestua zyrtarisht dhe u pezullua nga posti i tij. Ai përballet me akuza për korrupsion, ryshfet dhe lidhje të dyshuara me Partinë e jashtëligjshme të Punëtorëve të Kurdistanit (PKK), të cilën qeveria turke e cilëson si organizatë terroriste. Megjithatë, Imamoglu ka mohuar të gjitha akuzat, duke i cilësuar si të motivuara politikisht.
CHP ka denoncuar arrestimin e tij si një “përpjekje për grusht shteti” dhe ka organizuar primare të brendshme për të treguar mbështetjen popullore ndaj tij. Votimi i së dielës u shoqërua me një pjesëmarrje të madhe, e cila, sipas Ozel, është “përgjigja më e fortë” ndaj përpjekjeve për ta larguar Imamoglu-n nga gara politike.
Arrestimi i tij ka shkaktuar protesta të mëdha në disa qytete të Turqisë, me mijëra demonstrues që janë përplasur me policinë. Autoritetet konfirmuan arrestimin e më shumë se 300 personave, ndërsa pamjet nga rrjetet sociale tregojnë policinë duke përdorur topa uji, sprej piper dhe plumba gome për të shpërndarë protestuesit.
Ndërkohë, CHP ka bërë thirrje për zgjedhje të parakohshme, duke vënë në pikëpyetje legjitimitetin e Erdoganit. “Zgjedhjet presidenciale të parakohshme tani janë të pashmangshme,” tha Ozel, duke sfiduar presidentin aktual për një përballje të drejtpërdrejtë në kutitë e votimit.
