Agjencia e Mbikëqyrjes Policore raportohet se ka nisur hetimet për një efektiv në Qarkun e Elbasanit, sepse dyshohet se ka marrë 100 mijë paund në shtëpinë e Aqif Bezatit, mik i të shumëkërkuarit Talo Çela.
Deri tani nuk ka një njoftim zyrtar nga vetë Agjencia e Mbikëqyrjes Policore, por bëhet me dije se efektivi ka ka ndërhyrë në shtëpinë e Bezatit në Belsh para se të shkonin kolegët e tij. Prokuroria e Elbasanit ka zbardhur sot operacionin, ku u kap arsenal armësh dhe miliona lekë në valutë të huaj.
Shuma prej 100 mijë paundësh nuk është reflektuar as në njoftimin për mediat të Policisë dhe Prokurorisë. Efektivi po hetohet nga Agjencia e Mbikëqyrjes Policore, nëse paratë janë marrë prej tij apo ai ka bashkëpunuar me persona të tjerë për t’i larguar para se të shkonte Policia.
Më datë 13.10.2022, ora 07.00 e në vijim, është ushtruar kontroll në banesën e shtetasit A.B, ndodhur në fshatin Dëshiran të Belshit. Nga kontrolli në këtë banesë, rezulton se janë gjetur dhe sekuestruar këto sende të cilësinë e provës materiale:
- Një armë zjarri e llojit pistoletë TT, model 54 me një krëhër me 8 fishekë, 539 copë fishekë mod.54, kal.7.62 mm;
- Një armë zjarri luftarake mol.56 dhe kal.7.62 mm, 5 krëhëra hark metalik nga të cilët 4 të mbushur me fishekë mod.56 dhe kal.7.62 mm;
- 2835 copë fishekë mod.56 dhe ka.7.62 mm, 9 copë fishekë armë zjarri mod.53, kal.7.62 mm; – – 2 granata dore mësymëse;
- 2 ndezësa të unifikuar;
- 3 granata dore të tipit mbrojtëse me ndezësa dhe unifikuar dhe një granatë dorë mbrojtëse me tapë ebaniti;
- Një qese plastike me material bimor të thatë të ngjashëm për nga era dhe karakteristikat fizike me lëndën narkotike të llojit cannabis sattiva me peshë totale 3.6 kg, një sasi bimësh të thata me kërcell dhe boçe të ngjashme me bimën narkotike të llojit opium me peshë totale 1.4 kg;
- 2 aparate telefonik celular, 10 copë fishekë armë gjahu kal.12 mm dhe një sasi e konsiderueshme të hollash prej 54.000 lekë, 260.000 lekë, 1.056.000 lekë, 2.170.000 lekë, 220.000 lekë, 980 pound britanik, 4020 pound britanik, 7.250 euro, 1700 euro.
