“Operacioni Ura e Londrës”, ky është kodi për operacionin që do të vijojë për ditët dhe javët pas vdekjes së Mbretëreshës Elisabeta II.
Një seri dokumentarësh të publikuar më herët kanë zbuluar detaje për operacionin në fjalë.
Mbretëresha ka qëndruar në fronin mbretëror që prej vitit 1952, periudha më e gjatë nga çdo monark në historinë e Britanisë. Dhe gjatë kësaj kohe, ajo ka parë dhjetra kryeministra të Britanisë, gati 20 Lojëra Olimpike Verore dhe rreth 6 Papë.
Mbretëresha është guri i themelit të “Commonëealth”, kreu i rreth 600 organizatave dhe bamirësive dhe luan një rol të rëndësishëm në aleancën e Mbretërisë së Bashkuar me shtetet e tjera. Vdekja e mbretëreshës do të sillte ndryshim rrënjësor, jo vetëm për Britaninë, por për të gjithë botën.
Operacioni “London Bridge”
Sekretari privat i Mbretëreshës, Edward Young do t’i dërgojë menjëherë një mesazh kryeministrit aktual. Ai mesazh do të ketë përmbajtjen “Ura e Londrës ka rënë”.
Kryeministri menjherë do të nisë zbatimin e Operacionit “Ura e Londrës”. Brenda pak minutash, 15 qeveri jashtë Britanisë, ku mbretëresha është kreu i shtetit, do të njoftohen përmes një linje telefonike të sigurtë. Njoftimi do t’i përcillet 36 shteteve të tjera të “Commonwealth”.
Dyert e Pallatit Buckingham do të shfaqin njoftimin e ndarjes nga jeta në një letër me sfond të zi.
Në të njëjtën kohë, agjencitë mediatike në mbarë botën do të njoftohen për t’u përgatitur për lajmin. Çdo radio-stacion në Britani do të njoftohet përmes një drite që do të fiket dhe ndizet në shenjë alarmi për një katastrofë.
I gjithë programacioni i BBC do të ndërpritet dhe do të nisë menjëherë transmetimi për lajmin e fundit. Moderatorët dhe spikerat do të vishen me rroba të zeza, ndërsa shiriti tradicional i televizioit BBC do të kthehet nga i kuq, në të zi.
Gazetat, televizionet dhe radiot në Britani do të transmetojnë për ditë të tëra. Në të njëjtën ditë me vdekjen e mbretëreshës, djali i saj i madh, Charles do të bëhet mbret.
Në atë ditë, bursa, dyqanet dhe kafenetë do të mbyllen në shenjë respekti.
Një ditë pas vdekjes së mbretëreshës, në një transmetim direkt, Charles do të mbajë fjalimin e tij të parë si mbret, dhe qeveria do të betohet për besnikëri nën oshëtimën e 41 topave të shkrepur në Hyde Park, Londër.
Më pas, Mbreti Charles, nëse ky do të jetë emri që do të zgjedhë, do të nisë një tur në qytetet britanike duke takuar krerët në Edinburgh, Belfast dhe Cardiff, përpara se të kthehet në Londër. Gjatë kësaj periudhe BBC do ta ketë të ndaluar transmetimin e emisioneve zbavitëse.
Katër ditë pas vdekjes, arkivoli me trupin e mbretëreshës do të shoqërohet në një ceremoni ushtarake nga Pallati Buckingham në Westminister Hall. Aty do të qëndrojë për katër ditët e ardhshme. Më pas Mbreti Charles, familjarët dhe të afërm do të kryejnë homazhe, raporton newsbomb.al.
Më pas dyert do të hapen për qindra-mijëra njerëz të mbledhur jashtë. Funerali do të ndodhë 10-12 ditë pas vdekjes së Mbretëreshës. Dita e funeralit do të jetë pushim për të gjithë Mbretërinë e Bashkuar. Bursa dhe shumë biznese do të mbyllen.
Në orën 11:00 kambana e Big Bengut do të bjerë, ndërsa qyteti do të zhytet në heshtje. Pas ceremonisë, arkivoli do të dërgohet në Kishën e Shën Gjergjit, ku me gjasë Mbretëresha Elisabeta e II-të do të prehet pranë babait të saj, Mbreti George VI.
I gjithë procesi i funeralit pritet të kushtojë miliarda paund. Rreth një vit më pas, autoritetet do të nxjerrin në qarkullim monedhën e re me fytyrën e mbretit, po ashtu pasaportat britanike, pullat postare dhe unifromat do ta reflektojnë këtë ndryshim.
Edhe himni kombëtar i Britanisë do të ndryshojë nga “God Save dhe Queen”, në “God Save the King”.
Vdekja e mbretëreshës mund të sjellë ndryshime rrënjësore te shtetet e Commonëealth, shumë prej të cilave kërkojnë të kthehen në republika.
Funerali i mbretëreshës me gjasa do të jetë më i madhi i kohës tonë, dhe do të shënojë fundin e një epoke.
