Një operacion i suksesshëm i Policisë së Shtetit, i quajtur “Jug & Veri”, ka çuar në arrestimin e katër personave të dyshuar për trafikim të lëndëve narkotike dhe armëve. Hetimi, i udhëhequr nga Seksioni për Hetimin e Narkotikëve në DVP Elbasan dhe i mbështetur nga Forca e Posaçme Operacionale, përfundoi pas disa javësh me metoda speciale.
Arrestimet u kryen në flagrancë, ku u ndaluan A. G. (31 vjeç), E. Q. (29 vjeç) dhe F. P. (35 vjeç). Në një hetim të mëtejshëm, u ndalua edhe M. M. (31 vjeç), banues në Shkodër, i cili dyshohet se kishte ofruar automjetin e tij për transportimin e drogës. Gjatë operacionit, autoritetet kanë sekuestruar 41 kg Cannabis Sativa, një armë zjarri kallashnikov me municion, dy automjete dhe dy celularë.
Gjatë ndërhyrjes, A. G., një nga të arrestuarit, ka kundërshtuar punonjësit e policisë, duke dëmtuar një nga automjetet e shërbimit gjatë tentativës për t’u larguar. Hetimet tregojnë se grupi kriminal operonte në nivel kombëtar, duke shpërndarë drogë nga veriu në jug të vendit dhe kishte marrë kontakte për trafikimin jashtë Shqipërisë.
Kontrolli në automjetin që udhëhoqi A. G., si dhe në atë të F. P., ka bërë të mundur gjetjen e armëve dhe lëndëve narkotike. Automjeti i F. P. dyshohet se po transportonte drogën nga Shkodra drejt Elbasanit, me destinacion për të dalë jashtë vendit.
Materialet e procedurës janë dërguar në Prokurorinë e Elbasanit për akuzat e lidhura me trafikimin e armëve dhe narkotikëve, si dhe përkundërshtim ndaj forcave të rendit dhe shkatërrim të pronës. Ky operacion vije në një kohë kur autoritetet po intensifikojnë përpjekjet për të goditur krimin e organizuar dhe trafikimin e lëndëve narkotike në vend.
