Nëntë shtetas shqiptarë janë arrestuar gjatë një operacioni anti-kanabis në Spanjë. Shqiptarët kultivonin sasi të mëdha kanabisi dhe më pas e tregtonin në të gjithë Europën.
Policia spanjolle bën me dije se operacioni u zhvillua në Alicante, pas informacionit nga kompanitë energjitike, të cilat kishin raportuar konsum të pazakontë energjie në disa banesa.
Policia bastisi dy magazina në Alicante dhe Elx ku arriti të sekuestrojë plot 1660 bimë kanabis sativa.
Gjithashtu u sekuestruan edhe 445 gramë hashash, 605 gramë marihuanë, 510 euro cash, një automjet që të arrestuarit transportonin drogën dhe disa pajisje për rritjen e bimëve narkotike.
Të arrestuarit janë të moshës nga 20 deri në 36 vjeç, dhe ndaj tyre janë dhënë tashmë masat arrest në burg.
Është e paqartë nëse emri i operacionit policor i koduar “Bulqiza” ka lidhje me origjinën e personave të arrestuar.
