Operacija policore e koduar “Metalurgjiku” është finalizuar, pas disa muajsh hetimesh të realizuara me metoda speciale, në bashkëpunim me Prokurorinë për të goditur krimet mjedisore. Gjatë këtij operacioni, janë proceduar penalisht 2 subjekte juridike, për shkelje të ligjit nr. 9754, që kanë kryer aktivitet të paligjshëm në përpunimin e mbetjeve dhe prodhimin e ferrokromit, duke ndotur mjedisin.
Autoritetet kanë arrestuar 16 shtetas, përfshirë 9 të huaj, që mbajnë role drejtuese, teknike dhe punonjës. Po ashtu, janë shpallur në kërkim 8 individë, aksionerë të kompanive të implikuara. Operacioni është menaxhuar nga Drejtoria Vendore e Policisë Elbasan dhe Komisariati i Policisë Elbasan, me mbështetje të Prokurorisë.
Arrestimet përfshijnë individë me role të ndryshme në kompanitë e dyshuara, duke përfshirë administratorë, drejtorë prodhimi dhe inxhinierë. I. D., shefi i Sektorit të Mjedisit në Bashkinë Elbasan, është arrestuar për shpërdorim detyrash dhe falsifikim dokumentesh. Materialet përkatëse janë referuar Prokurorisë për hetime të mëtejshme.
Sipas hetimeve, dy subjektet tregtare në zonën e ish-Metalurgjikut, Bradashesh, kanë kryer shkelje të rënda të legjislacionit mjedisor, duke ndotur ajrin, ujërat dhe tokën, si dhe duke mos menaxhuar siç duhet mbetjet e baterive. Si rezultat i shkeljeve, u vendosën masa administrative prej 3.000.000 lekësh për një subjekt dhe 10.000.000 lekësh për tjetrin, ndërsa aktiviteteve të të dyja subjekteve iu pezulluan deri në përmbushjen e kërkesave ligjore.
Gjatë operacionit janë sekuestruar celularë dhe DVR, ndërsa materialet e procedurave janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme. Hetimet vazhdojnë për kapjen e të dyshuarve të shpallur në kërkim, të cilët përballen me akuza për ndotje mjedisore dhe aktivitete të paligjshme.
