GREQI- Autoritetet greke kanë zbuluar dy ngarkesa kokainë në një operacion të befasishëm. Gjatë kontrollit në kontenierët, që supozohej të transportonin produkte industriale, u gjetën kokainë. Lënda narkotike ishte fshehur mirë, por u zbulua me anë të pajisjeve me rreze X, por edhe dy qenve antidrogë, të cilët Policia greke i ka quajtur Max dhe Kybber.
“Konkretisht, gjatë kontrolleve në doganën e 3-të të Pireut, me një mjet vetëlëvizës me rreze X, në njësitë ftohëse të kontejnerëve u zbulua një lëndë organike e dyshimtë. Pas indikacionit pozitiv nga qentë zbulues Max dhe Kyberr, pasoi një kontroll fizik”, raporton “Protothema”.
Në kontenierin e parë u gjetën 67 pako kokainë, me peshë bruto 78 kilogramë. Vlera e kokainës së sekuestruar llogaritet në rreth 3.51 milionë euro. Në kontenierin e dytë janë sekuestruar 47 pako kokainë, me peshë bruto 53 kilogramë dhe vlera e tyre llogaritet rreth 2.39 milionë euro.
Pesha totale bruto e kokainës arrin në 131 kilogramë dhe vlera e saj është përllogaritur të jetë 5.9 milionë euro. Hetimi është ende aktiv dhe nuk ka informacione për organizatat kriminale që po e prisnin apo destinacionet e saj. Ndryshe nga herët e tjera, pakot e mbështjella me natriban nuk kanë pasur sipër tyre logo apo stampa të shënuara apo që personifikonin kode për pritësit e mallit.
