Katër anëtarë të një organizate kriminale që merret me trafikimin e lëndëve narkotike janë arrestuar nga policia greke në Zografou. Në mesin e të arrestuarve ndodhen dy shtetas grekë dhe dy shqiptarë. Gjatë operacionit, policia ka sekuestruar rreth 6 kilogramë kanabis, 20,000 euro në cash dhe disa telefona celularë.
Siç bën të ditur policia, anëtarët e organizatës nuk jetonin brenda konvikteve studentore, por dyshohet se ishin të angazhuar në shpërndarjen e drogës brenda kampusit universitar. Operacioni është kryer nga Nën-Drejtoria e Luftës dhe Zbulimit të Krimeve në Athinë, e cila është pjesë e Drejtorisë së Përgjithshme të Policisë së Atikës.
Aktivitetet e operacionit filluan herët në mëngjes dhe vazhdojnë ende. Kjo ngjarje vjen në një kohë kur probleme me trafikimin e drogës dhe krimin e organizuar janë në diskutim të vazhdueshëm në Greqi.
