Rreziku i përhapjes së virusit Nipah jashtë Indisë është i ulët, sipas Organizates Botërore të Shëndetësisë (OBSH). Pas raportimit të dy rasteve të infeksionit në India, OBSH-ja nuk rekomandon kufizime udhëtimi ose tregtie. Pavarësisht kësaj, vende si Hong Kong, Malajzia, Singapori, Tailanda dhe Vietnami kanë intensifikuar masat kontrolluese në aeroporte për të parandaluar përhapjen e mundshme të virusit.
OBSH-ja e konsideron të ulët rrezikun e shpërthimeve të mëtejshme dhe shprehu besim se India ka kapacitetet e nevojshme për të frenuar infeksionet. Sipas organizatës, nuk ka prova të transmetimit të lehtë nga njeriu te njeriu, megjithatë, ekziston mundësia e ekspozimit të mëtejshëm ndaj virusit që po qarkullon në lakuriqët e natës në India dhe Bangladeshin fqinj.
Virusi Nipah transmetohet kryesisht nga lakuriqët e natës dhe kafshët si derrat, duke shkaktuar ethe dhe inflamacion të trurit. Ai ka një shkallë vdekshmërie që arrin nga 40% deri në 75% dhe aktualisht nuk ka kurë të licencuar, megjithëse disa vaksina janë në fazën e testimit. Transmetimi te njerëzit ndodh zakonisht nga lakuriqët e infektuar ose frutat e prekura, por përhapesi nga njeriu te njeriu është i ndërlikuar dhe zakonisht kërkon kontakt të ngushtë me ata që janë të infektuar.
OBSH-ja thekson se burimi i infeksionit ende nuk është kuptuar plotësisht dhe i ka dhënë përparësi studimit të virusit për shkak të vdekshmërisë së tij të lartë dhe frikës për mutacione që mund ta bëjnë më të lehtë përhapjen. Dy punonjës shëndetësorë që u infektuan në Bengal të Perëndimor në fund të dhjetorit aktualisht janë duke marrë trajtim.
Në përgjithësi, virologët vlerësojnë se rreziku për popullatën e gjerë mbetet i ulët, pavarësisht disa shpërthimeve të vogla që kanë ndodhur në të kaluarën.
