Ditën e sotme nxënësit e kolegjit “Mehmet Akif” kanë dalë në protestë kundër vendimit të marrë nga qeveria për mbylljen e këtij institucioni.
Nxënësve i’u bashkuan dhe prindërit bashkë me mësuesit ku kërkuan anulimin e menjëhershëm të këtij vendimi, pasi sipas tyre kolegji “Mehmet Akif” plotëson të gjitha kushtet dhe kriteret e vendosura nga Ministria e Arsimit.
Një nga gjimnazistet u shpreh për mediat se ky shtet po u shkatërron ëndrrat dhe se pas 30 vitesh po mbyllet shkolla e dijes dhe jetës.
Gjithashtu, nxënësit treguan për kamerat edhe medaljet e marra të firmosura nga kryeministri Edi Rama.
“Presioni është i madh, sidomos për ne maturantët. Edhe shumë nxënës të rinj që këtë vit erdhën në këtë shkollë u janë prerë ëndrrat në mes, eliminimi i kësaj shkolle elitare është plotësisht gabim. Mua më kujtohet si tani kur mora vesh se do studioja në një shkollë aq dinjitoze me eksperiencë prej 30 vitesh, emri i së cilës jehonte kudo me sukseset e arritura. Po sot ç’po ndodh me ëndrrën time?!
S’më jep përgjigjie askush, se ju mendoni se shkatërroni çdo gjë me një firmë? Harruat se ato nderimet me medalje të arta dalin pikërisht nga kjo shkollë, nëse duhet të shkatërrosh vendin nuk duhen bomba, mjafton të shkatërrosh arsimin, si bombë na erdhi ky lajm. Shkolla është e jona dhe nuk mund të na e merrni. Na thanë duajeni kombin po vetë na përzënë, ëndrrat na i futën në sirtar. Mehmet Akif pas 30 vitesh meriton të rrëzohesh, ju terroristat që keni ardhur këtu na dhatë, armën më të fortë plumbin e dijes dhe penën blu. Po mbyllni shkollën e dijes dhe jetë”, tha ajo.
