Një tender sekret i Policisë së Shtetit, që ka si synim blerjen e pistoletave, municionit dhe paisjeve të tjera të sigurisë, është fituar nga kompania tradicionale “MSSC” që furnizon institucionet publike të sigurisë me armatim.
“Military System Supply Compani” që zotërohet 100 për qind të aksioneve nga biznesmeni Emiljano Dusha, ka krijuar monopolin e fitimtarit në tenderat e sekretë që zhvillohen nga institucionet e sigurisë si Policia e Shtetit, Drejtoria e Përgjithshme e Burgjeve, Aparati i Ministrisë së Brendshme dhe Reparti Nr.1001 që është Forca Tokësore e Ushtrisë Shqiptare.
Policia e Shtetit, ka njoftuar sot se përmes vlerësimit të ofertës së vetme nga Komisioni i Vlerësimit të Ofertave, ka shpallur fituese kompaninë private “MÇS” në vlerën financiare të ofruar prej 503 milion lekë të vjetra.
Kjo ofertë mësohet të ketë qënë e vetme në procedurën konkuruese. Ndërsa zbatimi i kontratës nga firma fituese për furnizimin e policisë me paisje armatimi, do jetë deri në datën 20 dhjetor 2025.
Kjo kompani ka krijuar monopolin e fitimit të tenderave sekrete, pasi në shumicën e rasteve ajo ndodhet e vetme në këtë garë.
Siç njoftoi dhe sot Policia “MSSC“ do vijojë bashkëpunimin me autoritetin policor për paisje armatimi e sende të tjera që konsiderohet si sekret.
Nga 2018 e në vijim kompania “MSSC” ka arkëtuar nga 82 transaksione bankare një shumë financiare prej 5,653,144,826 lekë të reja.
Pjesa dërmuese e kësaj shume financiare të arkëtuar nga kompania e mësipërme është paguar nga Policia e Shtetit, Reparti i Forcës Tokësore të Ushtrisë, Aparati i Ministrisë së Brendshme, Drejtoria e Përgjithshme e Burgjeve dhe Garda e Republikës.
