Sulmuesi i Real Madridit, Rodrygo Goes ka shpjeguar pse ai refuzoi një transferim te Liverpool pasi klubi i premtoi atij një rrugë “shumë të mirë” për karrierën e tij.
23-vjeçari brazilian iu bashkua Los Blancos nga Santos në verën e vitit 2019 për 45 milionë euro dhe ‘goditi’ duke shënuar pesë gola në gjashtë ndeshjet e tij të para.
Që atëherë ai është bërë një lojtar kyç për gjigantët spanjollë, duke bërë mbi 200 paraqitje gjatë një periudhe produktive katërvjeçare.
Por, gjërat mund të kishin qenë shumë të ndryshme për Rodrygon, i cili ishte shumë i lidhur me një transferim prej 3 milionë eurosh te Liverpool në vitin 2017, kur ai po vinte në radhët e të rinjve te Santos.
Tani përpara ndeshjes së sotme (e martë) në Ligën e Kampionëve kundër Manchester Cityt, braziliani tregoi arsyen e refuzimit.
“Ne nuk e mbyllëm marrëveshjen sepse nuk doja. Doja të qëndroja në Santos edhe pse oferta ishte shumë e mirë. Rruga që më premtuan do të ishte gjithashtu shumë e mirë për karrierën time. Do të mbaroja studimet në Angli për t’u përgatitur për futbollin evropian”, ka thënë fillimisht Rodrygo.
“Ka qenë gjithmonë ëndrra ime të luaja në Evropë. Gjithçka ishte shumë mirë, por dëshira ime foli më fort. Doja të qëndroja në Santos dhe të bëja pak histori në klub. Dhe kështu ndodhi”.
“Kam qenë në gjendje të përmbush ëndrrën time për të luajtur për Santos. Por është e vërtetë, pothuajse shkova në Liverpool”, përfundoi ylli i Real Madridit.
Menjëherë pas nënshkrimit për Real Madridin, ish-menaxheri i përkohshëm i Santos, Elano pretendoi se Rodrygo hodhi poshtë mundësinë për t’u transferuar në Anfield pasi u bë një ofertë “e ulët”.
