Njoftimi i SPAK
Prokuroria e Posaçme për Korrupsionin dhe Krimin e Organizuar ka bërë të ditur se, në kuadër të hetimeve për procedimin penal nr.136 të vitit 2025, janë identifikuar shkelje në tendera dhe ankande publike. Dy procedurat e prekura janë ndërtimi i tunelit të Llogarasë, pjesë e autostradës SH8, dhe ndërtimi i Unazës së Jashtme Tiranë, Loti 4.
Për ndërtimin e tunelit të Llogarasë, me fond limit mbi 18.9 miliardë lekë, janë evidentuar veprime të kundraligjshme nga Belinda Balluku, ish-Ministre e Infrastrukturës dhe Energjisë. Ajo së bashku me anëtarët e Komisionit të Vlerësimit të Ofertave, përfshirë Evis Berberin dhe Gentian Gjyli, ndihmuan në paracaktimin e fituesit të tenderit, duke krijuar avantazhe të padrejta për ata që ishin pjesë e bashkimit të operatorëve ekonomikë.
Në procedurën për ndërtimin e Unazës së Jashtme Tiranë, me fond limit mbi 2 miliardë lekë, Belinda Balluku po ashtu ka orientuar procesin e prokurimit, me ndihmën e të akuzuarve tjerë, ku janë paracaktuar fituesit dhe janë krijuar privilegje të padrejta për disa operatorë.
Veprimet e evidentuara janë në kundërshtim me ligjin për prokurimin publik dhe parandalimin e konfliktit të interesave. Pas shqyrtimit nga Gjykata e Posaçme, janë vendosur masa sigurimi ndaj të pandehurve. Belinda Balluku ka marrë ndalimin e daljes jashtë shtetit dhe pezullim nga detyra, përfshirë rolin e saj si zv.kryeministre dhe ministre. Ndërkaq, Gentian Gjyli dhe Erald Elezi janë vendosur në arrest shtëpie për akuzat e ngjashme.
Hetimet vazhdojnë, me përdorimin e metodave speciale dhe grumbullimin e provave digjitale. Prokuroria e Posaçme po shqyrton të gjitha detajet për të përcaktuar përgjegjësitë penale të të përfshirëve në këto procedura prokurimi.
