Një planet jashtë Sistemit Diellor, TRAPPIST-1e, ka rikthyer vëmendjen e shkencëtarëve si një nga kandidatët më premtues për të qenë një “Toka 2.0”. Sipas dy studimeve të publikuara në revistën The Astrophysical Journal Letters, vëzhgimet e realizuara me Teleskopin Hapësinor James Webb sugjerojnë se TRAPPIST-1e ka një atmosferë të pasur me azot molekular, një përbërës kyç që dominon atmosferën e Tokës.
TRAPPIST-1e është një nga shtatë planetët shkëmborë që orbiton rreth yllit të vogël xhuxh TRAPPIST-1, i cili gjendet rreth 40 vite dritë larg Tokës. Ky sistem planetar, i zbuluar më pak se një dekadë më parë, ka tërhequr menjëherë interesin e komunitetit shkencor për shkak të pozicionimit të disa prej planetëve brenda zonës së banueshme, ku është e mundur ekzistenca e ujit të lëngshëm.
Një ekip studiuesish, i udhëhequr nga Néstor Espinoza dhe Natalie Allen, përdori spektrografin NirSpec të James Webb për të analizuar dritën që kalon përmes atmosferës së TRAPPIST-1e gjatë kalimeve të tij përpara yllit amë. Të dhënat sugjerojnë se atmosferat e ngjashme me ato të Venusit apo Marsit, të pasura me dioksid karboni, janë të pamundura. Kjo sugjeron një atmosferë të pasur me azot, e ngjashme me atë të Tokës, ku përqindja e azotit molekular arrin rreth 78%.
Nëse këto gjetje konfirmohen me vëzhgime të tjera, TRAPPIST-1e mund të bëhet një kandidat kryesor për të mbështetur kushtet e jetës në një planet tjetër. Kjo do të shënonte një hapa të rëndësishëm për kërkimin e jetës jashtëtokësore dhe potencialisht për kolonizimin e hapësirës në të ardhmen.
Megjithatë, studiuesit theksojnë se kërkohen më shumë të dhëna për të konfirmuar përfundimisht praninë dhe përbërjen e atmosferës së TRAPPIST-1e, por shpresat mbeten të larta për zbuluar botë të tjera ku mund të ekzistojë jeta.
