Botërori i vitit 2034, i cili do të mbahet në Arabinë Saudite, premton të jetë një edicion modern dhe revolucionar. Detajet e organizimit po shpalosen gradualisht. Një nga projektet më interesante është ai i stadionit ‘Sky Stadium’, i planifikuar të ndodhet në katin më të lartë të një grataçele, në një lartësi prej 350 metrash. Ky stadium, që do të funksionojë me energji diellore dhe të erës, do të ketë kapacitet për 46,000 spektatorë dhe pritet të presë ndeshje të Botërorit.
Ndërtimi i ‘Sky Stadium’ pritet të fillojë në vitin 2027 dhe të përfundojë në vitin 2032, dy vjet para fillimit të Kupës së Botës. Kjo nismë është pjesë e një transformimi të gjerë në infrastrukturën sportive të vendit. Sipas ‘Arab News’, Arabia Saudite ka shpalosur plane për ndërtimin e 15 stadiumeve si pjesë e kandidaturës për Botërorin 2034. Këto zhvillime sugjerojnë një angazhim të fortë nga ana e Arabisë Saudite për të rikonstruktuar dhe modernizuar infrastrukturën sportive, për të ofruar një përvojë unike për tifozët dhe për të pritur një ngjarje me rëndësi globale siç është Botërori.
Organizimi i këtij kompeticioni tregon jo vetëm përkushtimin e Arabisë Saudite ndaj sportit, por gjithashtu edhe për potencialin e saj për të transformuar peizazhin e ngjarjeve sportive në nivel ndërkombëtar. Edhe pse ka kohë deri në realizimin e këtij projekti, interesimi dhe përgatitja për Botërorin e 2034 po rriten, duke ofruar një perspektivë interesante për tifozët e futbollit në mbarë botën.
