Ka nisur me debate mbledhja në Këshillin e Mandateve ku po shqyrtohet kërkesa e SPAK për heqjen e mandatit dhe arrestimin e Arben Ahmetajt.
Deputeti i Partisë Demokratike, Gazment Bardhi ka akuzuar kryetaren e Kuvendit, Lindita Nikolla dhe kolegët e maxhorancës se po vonojnë qëllimisht çështjen duke penguar drejtësinë.
Bardhi i ka bërë thirrje anëtarëve socialistë të Këshillit të Mandateve t’i hapin rrugën procesit për heqjen e mandatit të ish-ministrit Arben Ahmetaj, si dhe ka kërkuar që çëshja të përfshihet në seancën plenare të ditës së nesërme.
“Po bashkëpunoni në krim, mos i jenpi më shumë kohë Arben Ahmetajt që të fshihet. Boll e zvarritët çështjen. Të përfshihet në rend dite të seancës plenare të ditës së nesërme dhe të japim autorizimin prokurorisë që të veprojë. Mos pengoni drejtësinë. Opozita e ka gati raportin; të veprojmë pa asnjë vonesë, të shqyrtojmë e miratojmë nesër”, ka deklaruar Bardhi.
Megjithatë kryetarja e Kuvendit, Nikolla ka vendosur që çështja e Ahmetajt të përfshihet seancën e posaçme që do të mbahet javën e ardhshme, në datën 17 korrik.
