Një ngjarje e rëndë ka tronditur Këlcyrën, ku një 67-vjeçar është arrestuar për tentativën e përdhunimit të një vajze 10-vjeçare. Hetimet janë zgjeruar për dy fëmijë të tjerë që dyshohet se janë prekur nga i njëjti person, njëri prej të cilëve ka autizëm.
Ngjarja u bë publike 10 ditë më parë, kur nëna e vajzës bëri denoncimin në polici. Pas një ekspertize mjeko-ligjore, gjykata vendosi arrestimin e autorit. Sipas nënës, vajza kishte shfaqur shqetësim dhe kishte përmendur emrin e të dyshuarit. Pas disa pyetjeve, vajza rrëfeu se 67-vjeçari e merrte me makinë në shtëpinë e tij kur bashkëshortja nuk ishte atje dhe e prekte. Pasi ajo tregoi detajet e ngjarjes, nëna u shpreh se menjëherë kishte bërë denoncim.
Pas ngjarjes, vajza është kontaktuar vetëm një herë nga një psikologe, pa seanca të tjera mbështetëse. Ekspertiza në Tiranë nuk konfirmoi përdhunim, por gjeti mbetje në organin intim që dyshohet se përkasin autorit.
Rasti është zbuluar se nuk është i vetmi. Në fshatin “Fshat i Ri”, dy fëmijë janë marrë për ekspertizë nga policia për abuzime të mundshme nga i njëjti person. Gjyshja e dy fëmijëve tha se nipërit ishin traumatizuar dhe se djali me autizëm ka marrë kërcënime nga i dyshuari, duke i thënë se askush nuk mund t’i bënte asgjë. Kjo ngjarje është raportuar të ketë ndodhur dy ose tre vjet më parë.
Drejtoresha e Shërbimit Social në Bashkinë Këlcyrë u shpreh se kanë qenë të informuar vetëm për rastin e vajzës 10-vjeçare dhe se për dy fëmijët e tjerë nuk kishin marrë njoftime përkatëse nga policia, ndonëse ligjërisht kjo ishte e detyrueshme. Ajo shtoi se raporti mjeko-ligjor ka konfirmuar shenja në organin genital të vajzës.
Ngjarja ka ngritur shqetësime në komunitet lidhur me mbrojtjen e fëmijëve dhe trajtimin e rasteve të abuzimit seksual në këtë zonë.
