Një ngjarje tragjike ka ndodhur në ishullin e Zakynthos-it në Greqi, ku një fëmijë dy vjeçar shqiptar ka humbur jetën pas një sulmi nga një qen i racës ‘Pitbull’. Sipas mediave greke, incidenti ndodhi në oborrin e shtëpisë ku fëmija jetonte me babanë shqiptar dhe nënën britanike.
Fëmija, teksa po luante në oborr, u sulmua papritur nga qenushi, duke pësuar lëndime të rënda. Ai u transportua menjëherë në spitalin e Zakynthos-it, por përpjekjet e mjekëve për ta shpëtuar nuk patën sukses.
Policia dhe autoritetet përkatëse greke kanë nisur hetimet për të zbuluar rrethanat e plota të kësaj tragjedie, me qëllim të sqarimit të situatës se si ndodhi ky incident fatkeq. Pritet që përfundimet e hetimeve të ndihmojnë në përmirësimin e masave të sigurisë për fëmijët dhe për kontrollin e qenve potencialisht të rrezikshëm.
