Një raport i The Telegraph paralajmëron për një gjeneratë të re nacionalistësh serbë që po përgatiten për konflikt të armatosur në Bosnje, duke vënë në dukje rrezikun e destabilizimit të rajonit, 30 vjet pas luftës së përgjakshme. Gazeta britanike thekson se qindra militantë serbë janë angazhuar në luftë në Ukrainë përkrah forcave ruse, me shpresën se “Nëna Rusi” do t’i ndihmojë të rimarrin territore të humbura, përfshirë Kosovën.
Këta militantë përfshijnë veteranë të luftës së Bosnjës, të cilët po përdorin rrjetet sociale për të rekrutuar të rinj serbë me premtimin e pagesave të larta, deri në 23 mijë paund. Autoritetet janë të shqetësuara se, pas kthimit në Bosnje, këta luftëtarë mund të nxisin konflikte paramilitare dhe tensione etnike në një rajon ende të brishtë.
Një rast i veçantë është ai i Dario Ristic, një nacionalist serb që u plagos në Ukrainë dhe që tani është nën arrest shtëpie në Bosnje për pjesëmarrje në një formacion paramilitar. Ai ka një ndikim të konsiderueshëm online, me mbi 10 mijë ndjekës, dhe konsiderohet rrezik për rekrutimin e të rinjve.
Raporti gjithashtu thekson se kjo lëvizje drejtohet nga veteranë të luftërave të viteve ’90, të cilët ushqejnë ideologji përçarëse tek brezat e rinj. Analistët besojnë se këta ekstremistë shpresojnë se Rusia do t’i ndihmojë në zbatimin e projektit të “Serbisë së Madhe”. Edhe pse numri i tyre është i vogël, ndikimi i tyre pritet të jetë destabilizues.
Një figurë e njohur në këtë rrjet është Davor Savicic, ish-anëtar i një njësie paramilitare, i cili sipas informacionit ka luftuar në Krime dhe Sirinë, dhe është gjithashtu kolonel i GRU-së ruse. Ai ka krijuar struktura për të ndihmuar rekrutët të shmangin autoritetet dhe ofron mundësi financiare tërheqëse, veçanërisht në zona me papunësi të lartë si Modrica.
Sipas The Telegraph, ka shqetësime për bashkëpunim me autoritete shtetërore, përfshirë takime mes liderëve lokalë dhe zyrtarëve rusë. Kjo infrastrukturë paramilitare mund të ketë pasoja të rrezikshme për sigurinë evropiane dhe britanike, duke përfshirë mundësinë e realizimit të operacioneve hibride, si sabotazhe dhe trazira të dhunshme.
Për komunitetin mysliman boshnjak, ky fakt ringjall plagë të vjetra, duke i bërë ata të ndjehen të rrezikuar dhe të shprehin shqetësim për rikthimin e frikës dhe dhunës.
