Një kompani si “Kriol.AL” e themeluar në Tetor të 2021 me vetëm një punëtor të regjistruar, Kristian Koni, ka ngritur dyshime të forta për specialistët e krimit-ekonomik në Tiranë, të cilët në 7 Prill 2025 hapën një dosje të hetimit pasuror, pas dyshimeve mbi aktivitetin e kësaj firme.
Kompania, ku punonte vetëm një element i botës së krimit, kishte deklaruar fatura shitje në vlerën prej 960 milion lekë të vjetra drejt një kompanie në Poloni, e quajtur “Redenberg” S.P”.
I dënuari për trafik droge dhe vrasje në Itali, kishte ndryshuar dy herë emrin e tij dhe për më tepër kishte zgjedhur të ndryshonte dhe strategjinë e biznesit të tij, nga tregtia e drogës në Itali në tregtinë e pajisjeve dhe makinave drejt një kompanie Polake.
Për pak vite ai kishte shitur mall shqiptar drejt Polonisë në vlerën prej 960 milion lekë të vjetra. Ndërsa kompania kishte vetëm një punëtor.
Shifra e madhe e faturave del nga sistemi i Tatimeve, ku “Kriol.AL” ka deklaruar fatura shitje në vlerën e mësipërme. Ndërsa fatura blerje ka vetëm me kompani “Shijaku”.
Nisur nga këto dyshime dhe manovrat e kryera lidhur me veprimet ekonomike për blerjen e një vile në “Rolling Hills” me vlerë mbi 800 mijë euro, prokuroria vlerësoi për sekuestrimin e 21 pasurive të regjistruara në emër të Kristian Konit dhe nënës së tij, Fitnete Meta.
Vendimi për sekuestrimin e pasurive pritet të Apelohet nga Koni dhe nëna e tij në gjykatën e Apelit, të cilët përmes avokatit do kërkojnë në gjykatë lirimin e pronave.
