Problematikat e shkaktuara nga reshjet e fundit po adresohen nga strukturat lokale në territorin e Bashkive të ndryshme. Në Bashkinë Korçë, janë duke u finalizuar punimet për sistemimin e rrugëve, veçanërisht në Njësitë Administrative Voskopojë dhe Bulgarec, ku po pastrihen tombinot mbi unazë dhe po monitorohen prurjet në lumin Kamenicë. Po ashtu, punohet për riparimin e argjinaturave të dëmtuara.
Në Bashkinë Kolonjë, janë ndërmarrë masa për devijimin e rrjedhës së lumit për të mbrojtur urën e Qinamit, dhe po ashtu është bërë pastrimi i ujërave në lagje të ndryshme. Në Ersekë, shërbimi zjarrfikës ka pastruar pusetën qendrore, duke konfirmuar që uji është i pijshëm.
Punët në Bashkinë Maliq përfshijnë mbylljen e çarjeve në argjinaturat e lumit Dunavec dhe Devoll, me mbështetje nga Ministria e Mbrojtjes. Në Bashkinë Pustec, situata është e normalizuar pa problematika.
Bashkia Devoll ka realizuar ndërhyrje për sistemimin e lumit në Progër, si dhe në Hoçisht, për të parandaluar përmbytjet në tokat bujqësore. Në Pogradec, komisionet kanë evidentuar dëme në 62 familje, ndërkohë që po shpërndahen ndihma ushqimore për të prekurit dhe po monitorohen raste të reja. Problematika është identifikuar përgjatë lumit të Verdovës dhe Rëmenjit, me ndërhyrje për menaxhimin e rrjedhjeve.
Në Dardhas, janë pastruar katër akse rrugore dhe po vazhdon puna për pastrimin e asfaltit dhe pushtave. Në aksin Pogradec–Bucimas, është ceduar një pjesë e korsisë së biçikletave. Ndërkohë, në rezervuarin Stropskë 2 janë evidentuar shkarje dherash dhe ekipet e emergjencave po vazhdojnë vlerësimet.
Sa i përket furnizimit me energji në Qarkun Korçë, disa zona kanë pasur ndërprerje, por të gjitha fiderat për objektet e rëndësishme janë funksionale. Punimet në aksin Qafë Plloçë–Qukës po vazhdojnë dhe qarkullimi është normalizuar me hapjen e rrugëve sekondare. Strukturat vendore po monitorojnë të gjitha zonat problematike për të siguruar një reagim të shpejtë dhe efektiv.
