Aktori i njohur i humorit, Florjan Binaj, ka shpërthyer në një reagim të fortë ndaj produksionit të “Big Brother VIP Albania”, përmes një postimi në Instastory. Reagimi i tij erdhi pas skenës së dhunshme ku banori Jozef Marku goditi Gjestin pak para se të largohej nga shtëpia në sezonin e katërt të reality show-t.

Binaj ironizoi emrin e programit duke e quajtur “Pig Brother Gjys’ VIP”, një etiketim që sugjeron se banorët nuk janë vërtet personazhe publike me peshë dhe krahasohen me sjellje të papranueshme.

“Në momentin që pashë çfarë ka ndodhur mbrëmë në ‘Pig Brother Gjys VIP’, ndjeva nevojën të shpreh publikisht një shqetësim që e kam trajtuar prej muajsh në videot e mia në YouTube: Edhe pse produksioni pretendon se është distancuar nga ngjarja, në fakt, prej kohësh duket se ka pritur me padurim një skenë të tillë për të rritur audiencën e një formati që ka kohë që ka dalë jashtë kontrollit,” – shkruan ai.

Ai gjithashtu kritikoi mënyrën sesi ndëshkimi për dhunën, i njohur si “zarfi i zi”, po trajtohet më shumë si një shpërblim sesa si sanksion serioz.

“Po promovohen paaftësia, injoranca dhe dhuna si vlera. Kur nuk je i aftë të krijosh vlera të vërteta, ose shfrytëzon ato të të tjerëve, ose përfundon duke prodhuar anti-vlera,” – përfundon Binaj.