Nga e hëna, policia do të nisë një operacion për ndalimin e përkohshëm të monopatinave elektrike, të cilat janë identifikuar si rrezik për sigurinë publike dhe burim aksidentesh. Ky njoftim u bë nga ministrja e Brendshme, Albana Koçiu, dhe drejtori i policisë së shtetit, Ilir Proda.
Kryeministri Edi Rama nënvizon se 991 raste aksidentesh të raportuara nga urgjencat janë më shumë se sa mjaft për të justifikuar këtë masë emergjente. Ai thekson se nevojitet hartimi i rregulloreve strikte bazuar në praktikat më të mira ndërkombëtare për të siguruar një qarkullim më të sigurt.
Analiza e bërë nga autoritetet ka nxjerrë në pah se përdorimi i monopatinave elektrike paraqet një rrezik të menjëhershëm për sigurinë publike, me raste aksidentes që përfshijnë madje edhe fatalitete dhe dëmtime të rënda. Për të adresuar këtë situatë, janë përcaktuar procedura standarde për ndëshkimin e drejtuesve të këtyre mjeteve dhe ndalimin e përdorimit të tyre në rrugë urbane dhe trotuare.
Drejtori Proda kërkoi mirëkuptimin e qytetarëve për këto masa, duke theksuar se policia do të angazhohet për të implementuar ndalimin e qarkullimit të monopatinave elektrike dhe do të sigurojë zbatimin e ligjit “Për Policinë e Shtetit”, duke përfshirë edhe bllokimin administrativ të këtyre mjeteve, në rastet e shkeljeve.
Ky operacion vjen si përgjigje ndaj shqetësimeve në rritje për sigurinë në rrugë, duke pasur parasysh numrin e lartë të aksidenteve të raportuara. Qeveria po e trajton këtë fenomen me seriozitet maksimal për të garantuar sigurinë e qytetarëve dhe për të minimizuar rreziqet e mundshme që krijon përdorimi i monopatinave.
