Në mbështetje të nenit 100 të Kushtetutës, Këshilli i Ministrave ka miratuar një vendim për trajtimin me ushqim të punonjësve të Policisë së Shtetit dhe të tjerëve. Sipas këtij vendimi, punonjësit që kanë një kohëzgjatje pune prej 8 orësh përfitojnë një vakt drekë pa pagesë, ndërsa ata që janë në shërbime emergjente apo aktivitete të tjera më të gjatë se 8 orë, do të trajtohen me tri vakte ushqimi.
Gjithashtu, punonjësit e Qendrës së Edukimit Fizik dhe studentët që ndjekin trajnimet në institucionet arsimore të Policisë do të përfitojnë në përputhje me normat e përmendura. Studentët që trajnohen gjatë një dite pune do të marrin një vakt drekë, ndërsa për trajnimet që zgjatin më shumë, do t’u jepen tri vakte ushqimi.
Për më tepër, individët që hyjnë ilegalisht në Shqipëri, shqiptarët e kthyer nga vendet e tjera, si dhe ata të ndaluar do të kenë të drejtë të trajtohen me tri vakte pa pagesë, derisa të sqarohen statuset e tyre.
Ushqimi do të ofrohet nëpërmjet menseve ose shërbimeve të catering, duke i përmbushur kërkesat e legjislacionit të prokurimit publik. Në rastin kur ushqimi nuk mund të sigurohet, punonjësit e Policisë do të kompensohen financiarisht për ditët e punës.
Norma e kompensimit për një vakt drekë është caktuar në 500 lekë, ndërsa për tri vakte në 900 lekë. Vlerat e kompensimit do të indeksohen çdo vit sipas inflacionit. Shpenzimet financiare që rrjedhin nga ky vendim do të mbulohen nga buxheti i Ministrisë së Punëve të Brendshme.
Me këtë vendim, shfuqizohet vendimi i mëparshëm i Këshillit të Ministrave, datë 15 mars 2017, dhe ngarkohen Ministria e Punëve të Brendshme dhe Drejtoria e Përgjithshme e Policisë për implementimin e tij. Vendimi hyn në fuqi pas botimit në “Fletoren zyrtare” dhe efektet financiare do të fillojnë nga 1 janari 2026.
