Opinion nga Timoni.al
Nesër vendoset kreu i ri i SPAK. Në pamje të parë duket si një garë thjesht mes emrave, por realisht është një përballje e ashpër mes dy boshtesh gjeopolitikë: Bashkimit Europian dhe Shteteve të Bashkuara të Amerikës. Dhe ajo që është më e rëndësishmja, është një betejë për të ardhmen e luftës ndaj korrupsionit në Shqipëri.
Kjo nuk është një histori preferencash personale, e as një vendimmarrje e brendshme e drejtësisë shqiptare. Është një betejë për kontrollin e institucionit të vetëm që ka goditur realisht korrupsionin e niveleve të larta.
👉Pse BE mbështet Adnan Xholi dhe pse SHBA mban krahun e Klodian Brahos?
Është kuptuar qartë tashmë se Bashkimi Europian po mbështet kandidaturën e Adnan Xholi. Jo rastësisht. BE në Shqipëri ka vite që ka adoptuar një qasje të butë ndaj qeverisë Rama dhe establishmentit politik. Ata kërkojnë stabilitet. Dhe stabiliteti, për ta, do të thotë “mos prekje të ekuilibrave politikë”, edhe kur këta ekuilibra janë të zhytur në korrupsion.
Nga ana tjetër, SHBA ka marrë qëndrimin e kundërt. Ajo përkrah kandidatë që nuk mund të kontrollohen politikisht, kandidatë që i kanë provuar aksionet e tyre me goditje të forta ndaj korrupsionit. Amerikanët duan vazhdimësi të hetimeve që kanë nisur për dosjet më të mëdha të vendit – Balluku, Ahmetaj, ish-ministrat e tjerë, dhe një listë e gjatë politikanësh që ndihen sot të rrezikuar.
Për SHBA, SPAK është instrumenti kryesor për pastrim politik dhe për çrrënjosjen e krimit të organizuar nga strukturat e shtetit. Prandaj zgjedhja e kreut të ri është strategjike.
👉Edi Rama, i frikësuar dhe i pavendosur, lobon për njeriun e “qetë”
Edi Rama e di mirë çfarë rrezikon. Dosjet që qarkullojnë në SPAK nuk janë thjesht thashetheme politike. Janë hetime konkrete, të thelluara dhe me prova që prekin ministrat më të afërt të tij, Belinda Ballukun, Damian Gjiknurin, Arben Ahmetajn dhe të tjerë emra që mund të bien papritur. Prandaj ai kërkon një figurë që garanton qetësi, jo tronditje.
Adnan Xholi është pikërisht ajo figurë. Një profil që i kënaq të gjithë:
• politikën,
• biznesin,
• mediat,
• dhe të gjithë segmentin e nëndheshëm të interesave ekonomike që përfitojnë nga korrupsioni sistemik.
Gjoni është kandidatura që i siguron Ramës se lista e politikanëve të korruptuar nuk do të shkojë shumë larg. Se hetimet do të filtrohen. Se SPAK nuk do të marrë kthesën e fortë që SHBA kërkon.
👉2 kandidatë? Jo. Janë 2 grupe interesi!
Ndaj nesër nuk kemi një garë me 2emra.
Kemi një garë me 2 interesa madhore. Nga njëra anë është politika shqiptare, e frikësuar dhe e kapur që kërkon qetësi tek Xholi. Nga ana tjetër janë aleatët strategjikë të vendit që kërkojnë goditjen e korrupsionit, pa kompromis me Klodian Brahon.
Rezultati i nesërm nuk do të përcaktojë vetëm kreun e SPAK. Do të përcaktojë nëse lufta kundër korrupsionit do të vazhdojë apo do të ngadalësohet.
Nëse dosjet e rënda do të shkojnë drejt arrestimeve, apo do të rikthehemi te heshtja. Nëse Shqipëria do të ketë një SPAK të vërtetë, apo thjesht një institucion “të menaxhuar”.
P.S. Në foto Klodian Braho duke i dhënë dorën të delegurit të SHBA.
