BERLIN- Kryeministri Edi Rama gjatë fjalës së tij në Panairin e Turizmit në Berlin u shpreh se vendi ynë ishte Koreja e Veriut e Europës pasi u larguam nga perandoria sovjetike, ndërsa sot është një destinacion turistik për botën.
Rama u shpreh se deri pak vite më para numri i gjermaneve në Shqipëri ishte 100 mijë ndërsa vitin e kaluar 400 mijë gjermanë vizituan vendin tonë . Kryeministri tha gjatë fjalës së tij se Shqipëria është destinacioni turistik me rritjen më të shpejtë në Europë, ndërsa shtoi se nuk është më një perlë e fshehur por një fuqi turistike.
“U bëmë Koreja e Veriut e Europës, pasi u larguam nga perandoria sovjetike dhe u martuam me Kinën. Kur mora detyren në 2013 shifrat ishin ndryshe nga ’90. Shohim këtë vit shifra edhe më të larta. Deri pak vite më para numri i gjermaneve në Shqipëri ishte 100 mijë, vitin e kaluar është shtuar. Gjermanët janë lloji më i mirë i turistëve, gjermanët janë edhe pushuesit kryesor në botë ku ja kalojnë dhe kinezëve. Jo sepse janë shumë në shifra, por sepse qëndrojnë më shumë ditë gjithsej, kush mendon që gjermanët thjesht punojnë e kanë gabim. Dhe i duam se pijnë shumë birrë dhe hanë shumë kur na vizitojnë. Seriozisht tani, pse duhet ta vizitojnë gjermanët Shqipërinë? Nëse nuk i besoni fjalëve të mia, besoni Der Spiegel që e krahason Shqipërinë me ishujt Bora Bora. Edhe një tjetër burim gjerman, BILD, Shqipëria nuk është më një perlë e fshehur. Është fakt Shqipëria është destinacioni turistik me rritjen më të shpejtë në Europë. Bie dakord me BILD nuk jemi më perlë e fshehur po shndërrohemi në fuqi turistike,” tha Rama
