Presidenti rus Vladimir Putin ka emëruar të paktën 20 të afërm të tij në poste të rëndësishme në qeveri dhe në kompani shtetërore. Një hetim i mediave ruse sugjeron se nepotizmi në rrethin e liderit rus ka arritur nivele të pakrahasueshme që nga koha e carit Nikolla II.
Mes figurave të shquara është Anna Tsivilyova, vajza e kushëririt të ndjerë të Putinit, Yevgeny Putin, e cila u bë zëvendësministre e mbrojtjes në vitin 2024. Ajo ka lidhje të ngushta me ministrin e energjisë, Sergei Tsivilyov, bashkëshorti i saj. Inteligjenca ushtarake ukrainase raporton se ajo është angazhuar në monitorimin e korrupsionit brenda Ministrisë së Mbrojtjes dhe raporton drejtpërdrejt te Putini.
Djali i Tsivilyovës, Dmitry Loginov, drejton kompani të lidhura me Kolmar, ndërsa vëllai i saj, Mikhail Putin, mban një post në Gazprom. Po ashtu, Denis Putin, djali i Mikhailit, është aksionar në kompleksin Sheremetyevo.
Hetimi gjithashtu përmend Igor Putinin dhe Lyubov Kruglovën, kushërinj të presidentit që kanë përfituar pozita dhe kontrata të rëndësishme. Viktor Khmarin, djali i Kruglovës, është në krye të RusHydro, një nga kompanitë më të mëdha të energjisë elektrike në Rusi.
Dy vajzat e Putinit me ish-bashkëshorten Lyudmila, Maria Vorontsova dhe Katerina Tikhonova, gjithashtu kanë marrë role të rëndësishme në shtet. Ato morën pjesë në Forumin Ekonomik Ndërkombëtar të Shën Petersburgut në vitin 2024, megjithëse Putini nuk i ka pranuar kurrë publikisht si bijat e tij.
Raporti përmend gjithashtu lidhjet e Putinit me Alina Kabaeva, ish-gjimnaste olimpike, e cila besohet se ka dy djem me të. Hetimet sugjerojnë se ajo merrte pagesa të fshehta nga një njësi ushtarake e lidhur me Kremlinin. Kabaeva, 41 vjeçare, ka ndërtuar një perandori pronash që vlerësohet mbi 80 milionë paund.
Pavarësisht këtyre zbardhjeve, Kremlini nuk ka dhënë asnjë reagim ndaj akuzave lidhur me lidhjet e Putinit dhe nepotizmin në qeveri. Raporti i “Proekt” thekson se pushteti në Rusi është ngushtësisht i lidhur me interesat familjare të presidentit.
