Gazment Bardhi më në fund ka shfaqur pozicionim8n e tij në debatin për largimin e lidershipit të PD, pas humbjes katastrofike në zgjedhjet e 11 majit. Ai ka ofruar besnikëri në vazhdim duke u deklaruar kundër largimit të Sali Berishës nga kryesimi i Partisë Demokratike. Në një intervistë për emisionin Skedari Politik nga Ervin Koçi në A2 CNN, Bardhi pohon se “neni Basha” është i gabuar. Sipas tij askujt nuk duhet t’i mohohet e drejta për zgjedhur dhe e cilëson “nenin Basha”, si antidemokratik. Por Bardhi bën sikur “harron” se “Neni Basha” është vendosur nga vetë Berisha, në kohën kur synonte marrjen e PD dhe joshte demokratët me gjithfarë premtimesh për partinë. Duket se me këtë vetëofrim besnikërie, ai po i paraprin asaj që po përflitet së fundi brenda PD, se Bardhi nuk do të rizgjidhet më kryetar i grupit parlametar nga Berisha.
“E kam thënë dhe nuk ka sekret. Ky ka qenë një propozim i hershëm në PD që duhet të ishte pjesë e statutit një rregull i tillë. Kam qenë atëherë kundër dhe jam kundër një dispozite të tillë që e konsideroj antidemokratike në një statut të një partie që vepron mbi bazën e rregullave demokratike për dy arsye; së pari sepse çmoj që zgjidhjet nuk janë mekanike, duhet të jenë logjike dhe së dyti nuk mund të ketë rregull statutor që t’i ndalojë një individi një të drejtë kushtetuese që është e drejta për t’u zgjedhur. Pastaj janë anëtarët e partisë që vendosin nëse dikush do të duhet të zgjidhet apo jo. Por ta mohosh të drejtën për t’u zgjeshur me statut i jep statutin të PD një element antidemokratik brenda vetes”, deklaroi Bardhi.
