Turistët suedezë, një nënë dhe bir, që kishin humbur në Parkun Kombëtar të Llogarasë, janë gjetur pas disa orësh kërkimesh. Sipas policisë së Vlorës, ata u gjetën në afërsi të Qafës së thellë dhe janë në gjendje të mirë shëndetësore. Aktualisht, ata po shoqërohen drejt qytetit të Vlorës.
Turistët, 61 dhe 23 vjeç, ishin nisur në mëngjes për të eksploruar zonën, ku kishin përshkuar një pjesë të parkut dhe të pyjeve. Pas disa orësh, megjithatë, çdo kontakt me ta u ndërpre. Gjatë kësaj kohe, ata dërguan një sinjal SOS, i cili u kap nga autoritetet greke për shkak të mungesës së mbulimit me sinjal telefonik në anën shqiptare të gadishullit të Karaburunit. Emergjencat greke njoftuan menjëherë autoritetet shqiptare për situatën.
Në operacionin e shpëtimit u angazhuan forcat e Emergjencave Civile, si dhe specialistët e zonave të mbrojtura. Turistët u gjetën rreth orës 12:30 të natës, duke e mbyllur kështu një episod të tensionuar për autoritetet dhe familjet e tyre.
