TIRANË- Ekipi i futbollit të kombëtares serbe ka mbërritur në aeroportin e Rinasit për t’u kthyer në Beograd. Autobusi i futbollistave serbë është shoqëruar nga policia shqiptare nën masa të rrepta sigurie për të shmangur çdo incident.
Ndërkohë ndeshja e luajtur mbrëmjen e djeshme në stadiumin “Arena Kombëtare” përfundoi pa asnjë gol të shënuar. Sfida nisi mirë për kombëtaren shqiptare, ku u fitua dhe një penallti nga Elseid Hysaj. Por festa për goditjen e penalltisë së fituar nga Hysaj, zgjati shumë pak, pasi topi i gjuajtur nga Rey Manaj u ndal nga portieri serb.
Pjesa e dytë nisi po ashtu me disa raste për gol, por asnjë prej tyre të finalizuar. Raste ka pasur dhe nga kombëtarja serbe, por Strakosha nuk gaboi me ruajtjen e portës shqiptare.
Ndeshja e djeshme është e vlefshme për eleminatorët e Botërorit 2026. Shqipëria dhe Serbia janë pjesë e Grupit K për ndeshjet kualifikuese në Kampionatin Botëror 2026, së bashku me Letoninë, Andorrën dhe Anglinë.
Aktualisht, Shqipëria ka 4 pikë dhe është e dyta në këtë grup, ndërkaq Serbia mori sot pikën e vetme. E gjithë Tirana është blinduar, për shkak të rëndësisë së madhe që ka kjo ndeshje dhe për shkak të historisë së ndeshjeve të kaluara me Serbinë.
