#FreeRTSH

Shkroi: Jane Doe

Dita e djeshme nuk ishte një ditë e zakonshme për ne. Në takimet tona dhe bisedat virtuale që bëjmë me njëri-tjetrin jemi mësuar të qajmë hallet pa teklif. Por e djeshmja, nuk ishte një ditë e zakonshme!

U bë një vit që kur ti ke shkelur me çizmen e zezë në ditët tona që pimë mllefet dhe përtypim turpin e të papunit, megjithëse turpi nuk është një ndjenjë që na përket neve. Fatkeqësisht, në realitetin tonë idiot, për ne “të larguarit” e RTSH-së, ndjenja e turpit na shoqëron nëpër kafene si shok fëmijërie.

Por kjo nuk ndodh me ty, o i paudhë! Kjo ndodh vetëm me ata që s’kanë një grusht të fortë dhe nga pamundësia gjejnë lloj-lloj strehash të thukëta në trishtimin e realitetit pashërim. Sepse trishtimi është një vend i sigurtë, dhe kur mësohesh është keq.

Gjithsesi, dje nuk ishte një ditë e zakonshme.

Në tavolinën e një prej sallave të Kuvendit ke parë shumë fytyra që i njeh mirë. Mund të ishin më shumë, por mund të ishin dhe më pak, ose aspak, ashtu siç ti kishe shpresuar. Ti ke qenë i bindur që dëgjesa do dështonte, por këtë herë e bëmë “të madhe fare”, siç ke qejf ti.

Ata që pe dje, secili në karrigen e shqetësimit të vet, nuk janë ca gjynafqarë që mbështeten pas Opozitës, siç mediat u munduan ta kamuflojnë. Ti i njeh mirë fytyrat që pe dje!

Dëgjesa e djeshme nuk ishte një lëvizje politike për të mbrojtur interesat e ndokujt! Ishte një tryezë me njerëz të pushuar nga puna e të dorëhequr padrejtësisht, nën presion dhe pa asnjë bazë ligjore. Ata që pe dje ishin të inatosur, madje të tërbuar, dhe mos guxo të gjykosh askënd prej tyre, sepse një i pafe nuk ka të drejtë të gjykojë!

Por era e re sapo ka filluar Alfredo! Ne nuk do të ndalojmë me kaq!

Atë shprehjen tënde të famshme që ua çoje në 12 të natës punonjësve të tu “Koha jote fillon tani!”, do e kesh si çekiç mbi kokë, deri ditën që do largohesh, me gjithë “leckat” që ke sjellë nga Peqini Turistik.

Një sqarim publik për ty dhe të gjithë ata që po vdesin nga kurioziteti për të zbuluar identitetin e vërtetë të Jane Doe:

Adriatik Braçe: Ish-Përgjegjës i Sek.Admin.Pronave/ Ish-anëtar i Bordit të Administrimit

Artemisa Deda: Ish-Përgjegjëse e Promocionit

Aurora Pengu: Ish-Gazetare/ Moderatore

Bjolanda Cuku: Ish-Gazetare

Blerina Hamzollari: Ish-Gazetare

Denada Beqiri: Ish-Përgjegjëse e Montazhit

Devis Xhaja: Ish-Drejtor i Arkivit

Ditmir Krasniqi: Ish-Përgjegjës i sektorit të Makinave

Elton Kadisi: Ish-Drejtor i Promocionit & Shitjeve

Erald Veshi: Ish-operator

Ermal Hoxha: Ish-Drejtor i Prodhimit

Gerald Gjeogjini: Ish-Operator

Indrit Dollonja: Ish-Redaktor Përgjegjës i RTSH24

Juljana Gerveni: Ish-Përgjegjëse e Programacionit

Magdalena Alla: Ish-Gazetare

Melsi Qirici: Ish-Drejtuese e Njësisë së Programeve

Neim Hoxhaj: Ish-Operator

Ogert Peza: Ish-përgjegjës i Operatorëve

Pano Xhixho: Ish-Përgjegjës i RTSH Sport

Ne jemi çdo punonjës i RTSH-së që sot nuk ka mundësi të flasë!

Ne jemi çdo familjar dhe çdo prind që ti përcolle në shtëpi dhe ua ktheve jetën përmbys!

Ne jemi çdo grua e prekur nga mallkimi yt, që nuk ka dyer të trokasë për të gjetur një punë të re pas një jete kaluar në RTSH.

Ne jemi çdo burrë që refuzoi të poshtëronte burrërinë tënde të munguar!

Ne jemi Jane Doe, ajo që ti nuk do jesh dot kurrë: #ilirë.

FreeRTSH

P.S.: Sigurisht që vijon…