Modelja japoneze Aoi Fujino, e njohur për përfshirjen e saj në listën e 100 personazheve më seksi në botë, ka ndërruar jetë më 5 janar, në moshën 27 vjeçare, pas një beteje të gjatë me rabdomiosarkomën, një lloj tumori kancerogjen. Familja e saj njoftoi për ndarjen e saj të parakohshme, ndërsa vetëm pesë ditë para vdekjes, ajo ndau një mesazh prekës me ndjekësit e saj në Instagram, duke i falenderuar ata për mbështetje dhe duke kërkuar që ta mbajnë mend.
Aoi Fujino ishte diagnostikuar me këtë sëmundje tri vite më parë, çka e detyroi atë të ndërpriste karrierën për t’u përqendruar në trajtimin e saj. Pas trajtimit, ajo u rikthye në xhirime në gusht të vitit 2024, por gjendja e saj shëndetësore u përkeqësua, duke e detyruar atë të tërhiqej përsëri.
Rabdomiosarkoma, lloji i kancerit që e preku, zhvillohet në muskujt e lidhur me kockat dhe zakonisht shfaqet në kokë, qafë, organet urinare, këmbë dhe krahë. Ky tumor është më i zakonshëm tek fëmijët, por mund të prekë edhe të rriturit. Ekzistojnë dy forma kryesore të sëmundjes, rabdomiosarkoma embrionale dhe alveolare. Trajtimi përfshin kirurgji, kimioterapi dhe rrezatim, varësisht nga rasti.
Familja e Aoi Fujino shprehu mirënjohje për të gjithë ata që e mbështetën dhe e kujdesën gjatë përballjes me sëmundjen. Vdekja e saj la pas një boshllëk në botën e modës dhe të mediave sociale, ku shumë fansa dhe kolegë shkruan mesazhe ngushëllimi pas ndarjes së saj nga jeta. Ajo do të kujtohet si një simbol i bukurisë dhe qëndresës, dhe trashëgimia e saj do të vazhdojë të jetojë në zemrat e atyre që e donin.
