Rusia ka mohuar deklaratat e mediave dhe zyrtarëve polakë se raketat ruse kanë rënë në fshatin polak Przewodo pranë kufirit me Ukrainën. Ministria e Mbrojtjes i ka quajtur raportimet “një provokim të qëllimshëm për të përshkallëzuar situatën”.
“Asnjë goditje nuk u krye kundër objektivave pranë kufirit shtetëror ukrainas-polako nga mjetet ruse të shkatërrimit,” thuhej në deklaratë. Referuar njoftimit në Telegram, thuhet se fragmentet e raketave nga vendi i ngjarjes, të raportuara të filmuara nga media polake, nuk kishin të bënin me armët ruse.
Ndërkohë, Aleanca Ushtarake e NATO-s është vënë në lëvizje pas sulmit ndaj aleatit të vetë, Polonisë. I pyetur për zhvillimet e mbrëmjes së sotme në Poloni, një zyrtar i NATO-s i tha BBC-së: “Ne jemi duke i shqyrtuar këto raporte dhe po koordinojmë ngushtë me aleatin tonë Poloninë”.
Qeveria polake nga ana e saj ende nuk ka konfirmuar se çfarë ndodhi afër kufirit me Ukrainën. Imazhet që qarkullojnë në rrjetet sociale tregojnë një krater dhe një rimorkio të përmbysur, mesa duket të ngarkuar me grurë. Një imazh tjetër duket se tregon një fragment të një rakete.
Në Uashington, një zëdhënës i Pentagonit tha se ai ishte në dijeni të raporteve, por nuk kishte informacion për t’i vërtetuar ato. Ka një sërë shpjegimesh të mundshme.
Rusia nuk ka asnjë interes të synojë fermat polake, kështu që një lloj mosfunksionimi duket i mundshëm. Dhe, në një ditë kur mbrojtja ajrore e Ukrainës po punonte fort për të rrëzuar raketat ruse, është gjithashtu e mundur që një nga ato raketa të ishte rrëzuar nga kursi i vetë.
Një ish-ambasador i SHBA-së në NATO, Kurt Volker, ka thënë se është e rëndësishme t’i jepet Rusisë një shans për të shpjeguar atë që ka ndodhur. Volker tha se ka të ngjarë të ketë qenë një aksident. Por, tha ai, ne duhet të dëgjojmë Rusinë të thotë këtë.
